Ապրիլի 16, 2024
Հաշվետու համերգ՝ Սայաթ-Նովայի անվան երաժշտական քոլեջում
By Ասպրամ Ավանեսյան
Հունիսի 07, 2022
Ստեփանակերտի Սայաթ-Նովայի անվան երաժշտական քոլեջը երեկ մադաշատ էր. հաշվետու համերգին եկել էին ուսանողների ընկերներն ու հարազատները: Դահլիճում ուրախ տրամադրություն էր տիրում, բեմում՝ սաները ոգևորված, մի քիչ էլ՝ հուզված էին. պատասխանատու օր է, երկար են պատրաստվել: Աննա Դավթյանը քոլեջի դասական վոկալ բաժնի երրորդ կուրսի ուսանողուհի է, պատմում է թե ինչպես է համերգին պատրաստվել:
«Չնայած մենք պատերազմ ենք տեսել, բայց մեծ ոգևորությամբ ենք նորից բեմ բարձրանում...»:
Պատերազմից հետո նման միջոցառում քոլեջում առաջին անգամ է կազմակերպվել: Սաները, ուսուցիչները երկար են սպասել այս օրվան ու մեծ ոգևորությամբ են պատրաստվել: Համերգային կյանքը մեր առօրյան է՝ ասում է քոլեջի տնօրեն Անահիտ Սուլեյմանյանը:
«Մենք ունեցել ենք բազմաթիվ համերգներ: Ուսանողները ներդրել են իրենց ստեղծագործական լիցքերը և էներգիան: Ուսուցիչները շատ ոգևորված են: Համերգային կյանքը մեզ համար սովորական իրավիճակ է, սովորական աշխատանքնային պայման»:
Ուսումնական տարին հաջողությամբ ավարտելու առթիվ քոլեջի ուսանողներին շնորհավորելու էր եկել ԿԳՄՍ նախարար Անահիտ Հակոբյանը: Նա կարևորել է կրթության դերը պետության ու հասարակության բարեկեցության բարձրացման գործում։ Համերգի ընթացքում ԿԳՄՍ նախարարության կողմից քոլեջի մի խումբ սաներ, որոնք մասնակցել էին Հայաստանում, Հունաստանում, Չեխիայում և Ռուսաստանում կայացած հեղինակավոր մրցույթ-փառատոնների՝ պարգևատրվել են դիպլոմներով։ -Քոլեջի ուսանողներն առաջին անգամ չեն մասնակցում նման միջոցառումների, առավել ևս՝ առաջին անգամ չեն միջազգային մցանակներ ու առաջնային տեղեր զբաղեցնում,- ասում է քոլեջի տնօրենը:
«Մեր ուսանողները միշտ մասնակցում եմ տարբեր տեղական և միջազգային մրցույթների ու փառատոնների: Քոլեջի փողահար ուսանողներից մեկը Ռուսաստանում անցկացված մրցույթում գրավել է առաջին տեղը: Էջիմածնում անցկացված «Փոքրիկ քայլ» մրցույթին մասնակցած 5 ուսանողից 2-ը Գրան պրի է ստացել: Քանոնահար ուսանողուհիները մասնակցել են միջազգային մրցույթների»:
Այսպիսի միջոցառումները, մրցույթում հաղթանակներն ու համերգները մշտական բնույթ են կրում՝ ասում է Անահիտ Սուլեյմանյանը: Առաջիկա օրերիn նախատեսված է փողային գործիքների մրցույթ, որին մասնակցելու են նաև Ստեփանակերտի Սայաթ-Նովայի անվան երաժշտական քոլեջի ուսանողները:
