«ԱՀ 2023թ. պետական բյուջեի մասին» օրենքի նախագծը, ըստ հաստատված ժամկետացանկի, քննարկվել է ԱԺ բոլոր հանձնաժողովներում՝ կառավարության անդամների և առընթեր մարմինների ղեկավարների մասնակցությամբ։ Հանրապետության ֆինանսների և էկոնոմիկայի նախարար Վահրամ Բաղդասարյանը ներկայացրել է 2023թ. պետական բյուջեի ցուցանիշները՝ հետպատերազմյան իրողությունների արդյունքում ձևավորված տնտեսական միջավայրի և կատարված մակրոտնտեսական կանխատեսումների համատեքստում։ Պետական բյուջեի սեփական եկամուտները ծրագրվել են 49 մլրդ․ 850 մլն․ դրամի չափով։ 

«2023 թ․ պետական բյուջեի ծախսերը նախատեսվում են 215 մլրդ․171, 4 մլն․ դրամի չափով, որը ընթացիկ տարվա պետական բյուջեով նախատեսված ծախսերից նվազել է շուրջ 7,7 տոկոսով։ ՀՆԱ-ում ծախսերի մակարդակը կկազմի 6,1 տոկոս՝ ընթացիկ տարվա 77,5 տոկոսի դիմաց։ Արդյունքում, դեֆիցիտը կկազմի 21 մլրդ․321,4 մլն․ դրամ»։ 

ՀՀ կողմից տրամադրվող բյուջետային վարկի չափը 2023թ․-ին կկազմի 144 մլրդ․ դրամ՝ նշել է Վահրամ Բաղդասարյանը։ Երեկ Հայաստանի ԱԺ նիստում ֆինանսների նախարար Տիգրան Խաչատրյանը հայտնել է, որ Արցախի կառավարության դիմումի արդյունքում 8 մլրդ դրամը հատկացվել է ավելի շուտ՝ ընթացիկ տարում: Պատգամավոր Վահրամ Բալայանը հետաքրքրվեց՝ ինչո՞վ է պայմանավորված կառավարության նման դիմումը։ 

«Տարեսկզբից սոցիալական տարբեր ծրագրեր են շրջանառության մեջ մտցվել, որոնք բյուջեով նախատեսված չէին։ Օրինակ՝ 40 000-ականների, 68 000-ականների, տեղահանվածներին տրամադրվող 40 000-ականների և միանվագ 50 000-ականների ծրագրերը։ Եվ փաստացի սոցիալական ոլորտին այդչափ գումար ավել է ծախսվել, քան նախատեսված էր բյուջեով։ Եվ հենց սրանով պայմանավորված՝ ՀՀ-ը, սոցիալական ծրագրերին ուղղված գումարների ճեղքվածքը փակելու համար որոշում է կայացրել 8 մլրդ․-ը տեղափոխել 2022թ․»։

Հաջորդիվ Վահրամ Բաղդասարյանը ներկայացրեց ««Պետական պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին» օրենքի նախագիծը։ Նախագիծը մշակվել է հաշվի առնելով այն հանգամանքը, որ 2023թ․-ի համար պետական պաշտոններ զբաղեցնող անձանց բազային աշխատավարձի փոփոխություն չի նախատեսվում։ 

«Եվ օրենքի նախագծով սահմանված չափը՝ 63 հազ․ 300 դրամը չի ապահովում նվազագույն աշխատավարձի 80 տոկոսը՝ ինչպես որ ամրագրված է օրենքում։ Նշված խնդրի լուծման նպատակով՝ անհրաժեշտություն է առաջացել օրենքում կատարել լրացում, որի համաձայն պետական պաշտոն զբաղեցնող անձանց բազային աշխատավարձի չափը 2023 թ․- ի համար չի կարող ցածր լինել օրենքով սահմանված աշխատավարձի 70 տոկոսից»։

 Հանձնաժողովը դրական եզրակացություն է տվել երկու օրինագծերին էլ։  Այդպիսով, «2023 թ․ պետական բյուջեի մասին» օրենքի նախագիծն ու  ««Պետական պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին» օրինագիծը  ներկայացվելու են առաջիկա լիագումար նիստին։