Հունիսի 06, 2023

Ազգային ժողովի մշտական հանձնաժողովներում շարունակվում են հանրապետության 2022 թվականի պետական բյուջեի կատարողականի քննարկումները

By Ասպրամ Ավանեսյան Մայիսի 23, 2023

Հանրապետության արտաքին գործերի նախարարության 2022թ պահպանման ծախսերի նախահաշիվը կազմել է 880 մլն. 750 800 դրամ, բայց փաստացի կատարողականը հազմել է դրա միայն 75 տոկոսը: Արտաքին քաղաքական գերատեսչությանը պետական բյուջեով հատկացված գումարի «առյուծի բաժինը»` ավելի քան 445 մլն 870 հազար դրամը, հատկացվել է օտարերկրյա պետություններում արտգործնախարարության ներկայացուցչությունների պահպանման ծախսերին: Արցախի Հանրապետության մուտքի արտոնագրերի համար որպես պետական տուրք պետբյուջե է փոխանցվել 342 հազար դրամ` ասում է փոխնախարար Կարեն Կոստանդյան:

Ադրբեջանը մեծ գումարներ է ծախսում ոչ միայն իր զինանոցը հարստացնելու, այլ նաև դիվանագիտական դաշտում առավելություն ունենալու համար. ԱԺ նախագահ Արթուր Թովմասյանը հետաքրքրվում է` արդյոք, հատկացված գումարը հերիքո՞ւմ է արտաքին քաղաքական դաշտում դիմակայելու համար: Կոստանդյանը պատասխանում է.

«Իհարկե` ո՛չ. Միշտ կարելի է ավելի շատ գումար հատկացնել, բայց մենք ելնում ենք այն իրավիճակից, որը մենք ունենք: Արտաքին քաղաքականությունը բավականին բարդ և ծախսատար ոլորտ է: Մեր առջև ծառացած խնդիրների ծավալը և քանակը շատ ավելի շատ են, քան մեզ հատկացվող գումարները և ֆինանսավորումը, բայց մենք ստիպված ենք օգտագործել այն ռեսուրսներն ու այն հնարավորություները, որոնք ունենք և աշխատում ենք դրանք օգտագործել մաքսիմալ արդյունավետ»:

2022 թ պետական բյուջեով զբոսաշրջության վարչությանը հատկացումների հաստատված պլանը կազմել է 33 մլն 500 հազար դրամ, սակայն ճշգրտված պլանը կազմել է 8 մլն 500 հազար դրամ, իսկ կատարողականը՝ ավելի քան 5 մլն: Սահմանային հաճախակի սրումների պատճառով «Տուրիստբուս» ծրագիրը նախատեսված ձևով չի իրականացվել` նշում է ԿԳՄՍ նախարար Նորայր Մկրտչյան` ներկայացնելով, թե ինչպես են բաշխվել զբոսաշրջության վարչությանը հատկացված գումարները:

«Արցախի զբոսաշրջության ոլորտի միջոցառումներ, հատկապես «տուրիստբուս» նախագծի հաստատված պլանը կազմել է 2 մլն 266 հազար 400 դրամ: Արցախի տարածքում սահմանային լարվածության պատճառով օգոստոսի 5-ից 7-ը նախատեսված ուղևորափոխադրումները չեղարկվել են, ինչի փոխարեն նախնական ուղևորություններից 6-ը օգտագործվել է Սիսիան քաղաքում տեղի ունեցած հայ-իրանական «Նավասարդ» փռատոնին արցախցի մասնակիցների ուղևորափոխադրումը կազմակերպելու նպատակով: Հաջորդ ուղղությունը զբոսաշրջային ծառայությունների վերահսկողությունն է: Այդ ենթագծի հաստատված պլանը կազմել է 400 հազար դրամ, փաստացի կատարողականը 138 հազար դրամ: Տպագրական աշխատանքներ ենթագծի հաստատված պլանը կազմել է 2 մլն դրամ, փաստացի կատարողականը` 1 մլն 889 600 դրամ: Բրենդինք ենթագծի հաստատված պլանը կազմել է 491 600 դրամ, ծրագիրը կատարվել է 100 տոկոսով: Կապի ծառայությունների համար հաստատված պլանը կազմել է 2 մլն դրամ, փաստացի կատարողականը`195 600 դրամ: Սոցիալական մեդիամարքեթինգի ծառայությունների համար հաստատված պլանը կազմել է 1 մլն դրամ, փաստացի կատարողականը` 561 700 դրամ»:

«Արցախի ժողովրդավարական կուսակցություն» խմբակցության ղեկավար Դավիթ Մելքումյանն առաջարկում է ակտիվացնել ներքին տուրիզմը, ընդգծելով դրա կարևորությունը հատկապես ստեղծված իրավիճակում:

Արցախի հանրային հեռուստառադիոընկերության բյուջեի կատարման հաշվետվությունը ներկայացրել է հեռուստառադիոընկերության խորհրդի նախագահի պաշտոնակատար Լուսինե Ղարախանյանը: 2022 թվականի բյուջեով նախատեսված 450 մլն ՀՀ դրամ գումարից ծախսվել է 448 մլն ՀՀ դրամը, կատարողականը կազմել է 99,6 տոկոս` ասում է Ղարախանյանը:

«Գովազդի համար նախանշված 3 մլն ՀՀ դրամ եկամտի դիմաց ստացվել է 2 մլն 345 հազար ՀՀ դրամ: Բարեգործական խողովակներով ստացվել է 1 մլն 550 հազար ՀՀ դրամ, որն ուղղորդվել է ամանորյա ծրագրի պատրաստմանը: Պահուստային ֆոնդից ստացված 15 մլն 570 հազար ՀՀ դրամ գումարի գերակշիռ մասը՝ 14 մլն 144 հազ ՀՀ դրամը, օգտագործվել է շարժական հեռուստակայանի սպասարկմանը»:

«Ազատ Արցախ» թերթի գլխավոր խմբագիր Նորեկ Գասպարյանը, նախ, ողջունել է հանրապետության ԱԺ հայտարարությունը` կապված Նիկոլ Փաշինյանի վերջին հայտարարության հետ, ապա ներկայացրել 2022 թ բյուջեի կատարման մասին կաշվետվությունը: Հանրապետական թերթի 2022թ բյուջեի կատարողականը կազմել է 94 տոկոս, նախատեսված 114 մլն ՀՀ դրամից փաստացի ծախսվել է 108 մլն ՀՀ դրամը:

«Տպաքանակով պայմանավորված՝ պլանավորած 6 մլն 643 հազ ՀՀ դրամ եկամուտի փոխարեն ստացել ենք 2 մլն 124 հազ ՀՀ դրամ եկամուտ: Գործուղման ծախսերը լրիվությամբ չեն օգտագործվել»:

Պատգամավորական հարցադրումները կայքէջի որակի, սոցհարթակներում թերթի դիտելիության վերաբերյալ էին:

Last modified on Երկուշաբթի, 05 Հունիսի 2023 12:27
© 2021 ԱՐՑԱԽԻ ՀԱՆՐԱՅԻՆ ՌԱԴԻՈ