Նախագահի հրամանագրով ստեղծված պետական խորհրդի կազմում ընդգրկվել էին ինչպես Մարդու իրավունքների պաշտպանը, օրենսդիր ու գործադիր իշխանությունների ներկայացուցիչներ, այնպես էլ ՀՀ լիազոր մարմինների ներկայացուցիչներ և ոլորտի առաջատար փորձագետներ։ Շուրջ մեկուկես ամիս առաջ ստեղծված խորհրդի երկրորդ նիստում ամփոփվել են կատարված աշխատանքներն ու նախանշվել առաջիկա անելիքները։ Արտակ Բեգլարյանը բարձր է գնահատել խորհրդի ձևավորումից հետո կարճ ժամանակահատվածում իրականացված փաստահավաք աշխատանքը և խորհրդի անդամների հետ քննարկել առաջիկա աշխատանքների ուղղվածությանն ու ծավալներին առնչվող հարցեր: Խորհրդի նախագահի տեղակալ Լեռնիկ Հովհաննիսյանի խոսքով՝ ի սկզբանե պարզ էր, որ հսկայածավալ աշխատանք է սպասվում։ Այս ընթացքում կատարվել է բավականին աշխատանք՝ հատկապես թանգարանային ցուցանմուշների ցուցակների ճշտման գործում։ 

«Մենք հանդես եկանք կատարված աշխատանքների մասին զեկույցով և ներկայացրեցինք դրանք: Նաև խոսեցինք առաջիկա կատարվելիք աշխատանքների մասին: Դրանք նույնպես լայնածավալ են: Իհարկե, կան դժվարություններ, բայց դրանք փորձում ենք հաղթահարել խորհրդի ուժերով»: 

Նիստին հաստատվել է Արցախի Հանրապետության բռնազավթված տարածքներում մնացած թանգարանների եւ ցուցասրահների հավաքածուների ցանկը: Դրանք ներկայացրել է բռնազավթված տարածքների մշակութային ժառանգության պահպանության պետական խորհրդի քարտուղար Սերգեյ Շահվերդյանը։ Նրա խոսքով՝ ցուցակը կհրապարկվի առաջիկայում:

 «Հստակեցրեցինք այն հավաքածուները, որոնք մնացել են բռնազավթված տարածքներում: Ինչու՞ հիմա, որովհետև այդ հավաքածուները միայն պետական թանգարանները չեն: Բազմաթիվ հավաքածուներ կային նաև մասնավոր անձանց մոտ կամ մասնավոր հաստատություններում: Եվ այդ բոլոր հավքածուների անվանացանկը հավաքելը խնդիր էր»:

 Խորհրդի ստեղծման նպատակներից մեկն էր նաև համակարգել  բոլոր այն աշխատանքները, որոնք ուղղված էին արձանագրելու ադրբեջանական վանդալիզմի դեպքերը, հրավիրելու միջազգային կազմակերպությունների ուշադրությունն ու փորձել կանխել դրանք: Սերգեյ Շահվերդյանի խոսքով՝ այս ընթացքում արդյունավետ համագործակցել են ԻԿՕՄ և ԻԿՕՄՕՍ կազմակերպությունների հետ:  

«Այդ կազմակերպությունները մասնագիտացված են այս բնագավառում և ՅՈՒՆԵՍԿՕ-ի հետ սերտ և ակտիվ կապերի մեջ են: Եվ շատ կարևոր է, որ նման կազմակերպությունները նույնպես ներգրավված լինեն այս աշխատանքներում»: 

Նիստի ընթացքում ծավալվել է նաև քննարկում՝ կապված հետագա աշխատանքների հետ: Խորհրդի անդամները հանդես են եկել կարծիքներով ու առաջարկություններով: