«Արցախյան հիմնախնդիրը և Արցախի Հանրապետության արտաքին քաղաքականությունը» վերնագրով գիրքը  նոր զենք է՝ տեղեկատվական-քարոզչական պատերազմում։    Այն ներկայացված է փաստերի և խորհուրդների տրամաբանությամբ։ «Իր տեսակով դեռ միակն է»-,ասում է գրքի գլխավոր խմբագիր, պատմական գիտությունների դոկտոր, ԱԳ նախարար Դավիթ Բաբայանը,- նախարարության աշխատակազմը փոքրիկ հանրագիտարանի վրա աշխատել է շուրջ մեկ տարի։ Այն բաղկացած է երեք հիմնական մասից։ 

«Գիրքը բաղակացած է երեք հիմնական մասից։ Առաջինում ներկայացված են անհրաժեշտ պատմական հասկացություններ, երկրորդում՝ Ադրբեջանա-ղարաբաղյան հակամարտության իրավական, քաղաքական և մարդասիրական հարթությունները,  երրորդում՝ Արցախի Հանրապետության արտաքին քաղաքականության առանցքային հասկացությունները»։ 

Գրքում արծարծված են կարևոր թեմաներ՝ պատմական նկարներով ու քարտեզներով։ Այն նախատեսված է օրենսդիր և գործադիր մարմինների ներկայացուցիչների, բուհերի և ԶԼՄ-ների համար։ 

«Կարող է վաղը տարբեր թևերի ներկայացուցիչներ մեկնեն արտերկիր ինչ-որ միջոցառման մասնակցելու համար, սա փաստորեն մի փոքրիկ ուղեցույց է, որին ծանոթանալով կարելի է և դիմել,  և խոսել արցախյան հիմնախնդրի արտաքին քաղաքականության մասին, տարածաշրջանային գործընթացների մասին»։

 Ազգային ժողովի նախագահ Արթուր Թովմասյանը  կարևորելով ու արժևորելով աշխատությունը՝ համոզմունք է հայտնել, որ այն կարող է  օգտակար լինել նաև երիտասարդների համար, ովքեր ցանկանում են զբաղվել քաղաքականությամբ: Պետնախարար Արտակ Բեգլարյանը նույնպես ողջունեց նախաձեռնությունը, կարևորելով այն  որպես ուղեցույց, որն անհրաժեշտ է ոչ միայն սկսնակների, այլև՝ գործող պետական, քաղաքական գործիչների համար: 

«Կարևոր է տեղյակ լինել նախապատմությանը, բոլոր առանձնահատկություններին, փաստերին ու փաստաթղթերին, պետական դիրքորոշումներին, որպեսզի կարողանանք համակարգված գործողություններ կատարել և դիրքորոշումներ հայտնել, ինչպես նաև ամբողջության մեջ նույն լեզվով խոսել և նույն եզրույթաբանությունն օգտագործել»։

Նմանօրինակ աշխատությունները չպետք է մնան միայն մեր սեղանին, պետք է  մշակենք մեխանիզմներ,օգտագործենք բոլոր հնարավոր լծակներն ու գործիքները՝ այն   մեր սահմաններից դուրս տարածելու համար՝ ասում է  Արցախի նախագահի խորհրդական Լուսինե Ղարախանյանը․     ինֆորմացիոն-քարոզչական  դաշտում թիմային աշխատանքի անհրաժեշտություն կա: Դավիթ Բաբայանի խոսքով, գիրքն ավելի լայն շրջանակներում տարածելու համար նախատեսում են նաև էլեկտրոնային տարբերակի հրապարակումը։ Շուտով լույս կտեսնի գրքի ռուսերեն տարբերակը, նախատեսվում է այն  հրատարակել նաև անգլերեն, ֆրանսերեն, գերմաներեն և իսպաներեն լեզուներով։ Միջոցառման ընթացքում նախարար Բաբայանը պատասխանել է ներկաներին  հուզող հարցերին, լսել առաջարկներն ու խոստացել՝  հաշվի առնել բոլորի տեսակետները։ «Արցախյան հիմնախնդիրը և Արցախի Հանրապետության արտաքին քաղաքականությունը» գիրքը տպագրվել է բարերաների աջակցությամբ, այն վաճառքի ենթակա չէ։