Մարտի 28, 2024

Մայր բուհի գլխավոր մասնաշենքը պատրաստ է ընդունել ուսանողներին

By Մարգարիտա Ղուշունց Օգոստոսի 31, 2022

Այսօր Մայր բուհի նորակառույց գլխավոր մասնաշենքում էինք,  Արցախի պետական համալսարանի     ընդարձակ, լուսավոր լսարաններն ու ամբիոնները ապագայի հանդեպ հավատի նոր շունչ են տալիս:  Ռեկտոր Արմեն Սարգյանի հետ շրջում ենք բուհի գլխավոր մասնաշենքով:  Վերանորոգումն ավարտվել էր դեռևս 2021-ի նոյեմբերի 1-ին, մնում էր լուծել համապատասխան գույքի և տեխնիկայի հարցը՝ ասում  է  Արմեն Սարգսյանը։  Խնդիրը լուծվեց կառավարության, ԿԳՄՍ  նախարարության և համալսարանի ջանքերի շնորհիվ: Նոր մասնաշենքում սեպտեմբերի 1-ից դասերը կսկսեն բանասիրական ֆակուլտետը՝ առաջին հերթով և տնտեսագիտության ֆակուլտետը՝ երկրորդ հերթով: 

«Ինչու՞, որովհետև առայժմ հնարավորություն ենք ունեցել կահավորել նոր մասնաշենքի շուրջ 30 լսարան: Կահավորված են համապատասխան ֆակուլտետների դեկանատները, ամբիոնները, կաբինետները և լսարանները»: 

Համալսարանի ուսումնական երրորդ մասնաշենքն արդեն հանձնվել է կառավարությանը, դա է պատճառը,որ այնտեղ տեղակայված մանկավարժության և սպորտի, պատմության և իրավագիտության ֆակուլտետները տեղակայվել են երկրորդ մասնաշենքում: Արդյունքում ուսումնական պարապմունքներն անցկացվելու են երկու մասնաշենքերում: Հոկտեմբերի մեկից նախատեսվում է գլխավոր մասնաշենքում տեղակայել նաև բնագիտական ֆակուլտետը: Առաջիկա 15 օրվա ընթացքում նախատեսվում է կահավորել ևս 15 լսարան՝ ասում է Արմեն Սարգսյանը: 

«Նախկինում համալսարանի ձախ թևի վրա լսարաններ չեն եղել, այսօր այն ավելացել է շուրջ 50 տոկոսով: Այս ուսումնականում վերջնական շենքում կտեղակայվեն բանասիրության,տնտեսագիտության,բնագիտության ֆակուլտետները,հաջորդ ուսումնական տարվանից մյուս երկու ֆակուլտետները»:

 Վարչական ստորաբաժանումներում տեղափոխություններ չեն եղել, բոլորը տեղակայված են համալսարանի վարչական շենքում:  Տեղափոխությունները կլինեն հունվարից հետո միայն։      Արմեն Սարգսյանը հպարտությամբ է նշում՝ շենքը համապատասխանում է միջազգային բոլոր ստանդարտներին: 

«Տարածաշրջանի բարձրագույն  կրթություն իրականացնող ուսումնական հաստատությունների շարքում ամենահարմար, ամենակահավորված շենքն է: Այն ունի նաև կիսանկուղային հարկ, որի տարածքում են տեղակայված տարբեր սպորտաձևերի համար նախատեսված մարզադահլիճները»: 

Մասնաշենքը նաև ունի մեծ գրադարան, որը  սպասարկելու է ոչ միայն  համալսարանականներին, այլև Ստեփանակերտ քաղաքին: Շուրջ 600 քառակուսի մետր տարածքում ընթերցասերները  կարող են գտնել իրենց անհրաժեշտ գրքերը, նստել ընթերցասրահներում կամ օգտվել էլեկտրոնային գրադարանից, նաև կազմակերպել քննարկումներ՝  գրադարանի տարածքում տեղակայված հատուկ  սենյակներում: Այն պահին, երբ մենք մտանք  գրադարան,  աշխատողներն  ու  կամավոր ուսանողները  խմբավորում, դասավորում էին  գրքերը: Նիստերի 300 և 100 տեղանոց մեծ դահլիճները կահավորելու հնարավորություն դեռևս չեն ունենա՝ նշում է Արմեն Սարգսյանը: Կաշխատեն  խնդիրը  հնարավորինս  շուտ լուծել, քանի որ նախատեսվում են մշակութային միջոցառումները հենց այդ դահլիճներում անցկացնել: «Շենքում ենք տեղակայելու նաև նոր բացվող լեզուների ուսուցման կենտրոնը։ Այն աշխատողներին և ուսանողներին հնարավորություն է տալու ուսումնասիրել անգլերեն, գերմաներեն, ֆրանսերեն լեզուներ»: Բուհը նաև մասնագետների խնդիր ունի։ Լիովին բավարաված է միայն բանասիրական ֆակուլտետը։  Խնդիրը հատկապես սուր է  նեղ մասնագիտությունների գծով՝ ասում է ռեկտորը։ Այս խնդիրն առկա է նույնիսկ աշխարհի առաջադեմ բուհերում, բացը լրացնելու  համար օգտագործվում են փորձված տարբերակներ: Բուհն ունի բազմաթիվ զարգացնող կրթական ծրագրեր՝ ասում է Արմեն Սարգսյանը: 

«Տարեցտարի դիմորդների թիվն ավելանում է: Կան կրթական ծրագրեր, որտեղ հնարավոր չէ ուսուցումը կազմակերպել մեր հիմնական աշխատողներով։ Դրա համար կան մասնագետներ,որոնք ժամավճարային հիմունքներով այստեղ դասընթացեր են իրակնացնում: Նաև համագործակցում ենք հայաստանյան բուհերի հետ,որոնց մասնագետները մեկ կամ երկու շաբաթով գալիս և դասախոսություներ են անցկացնում: Նաև հնարավորություն ունենք ոչ ֆորմալ կրթության միջոցով լրացնել բացը, օրինակ անցյալ տարի արտասահմանյան մի շարք բուհերից դասախոսներ հեռավար եղանակով դասախոսոթւյուններ են կարդացել մեր ուսանողների համար: Սա մեծապես նպաստում է ուսումնական գործընթացի առաջընթացին»:

 Համալսարանի կրթական   ծրագրում կարևոր է նաև փորձուսուցման կազմակերպման գործընթացը, ինչի լիարժեք և արդյունավետ կազմակերպման համար համապատասխան կառույցների հետ համագործակություններ արդեն կան: Նոր մասնաշենքը հնարավորություն է տալու այդ համագործակցություններն ավելի սերտացնելու՝ ասում է մայր բուհի ռեկտորը: Համոզված է՝ նման շենքային,գույքային և տեխնիկական պայմանները խթանելու են ուսման որակի բարձրացմանը:

Artsakh Public Radio
© 2021 ԱՐՑԱԽԻ ՀԱՆՐԱՅԻՆ ՌԱԴԻՈ