Ապրիլի 20, 2024
Հայտնի է «Արցախյան գոյամարտ» խորագրով ինտելեկտուալ խաղի հաղթողը
By Մարգարիտա Ղուշունց
Հոկտեմբերի 04, 2022
Մշակույթի և երիտասարդության պալատի փոքր դահլիճում հավաքված աշակերտների տրամադրությունը բարձր էր, մարտական, պատրաստ՝ նվաճելու գլխավոր մրցանակը: Նրանք եկել էին մասնակցելու «Արցախյան գոյամարտ» խորագիրը կրող խաղ-մրցույթի հանրապետական փուլին: Ինտելեկտուալ խաղ-մրցույթն առաջին անգամ ԿԳՄՍ նախարարության արտադպրոցական ծրագրերի բաժինն է կազմակերպել՝ ասում է նախարարության արտադպրոցական ծրագրերի գլխավոր մասնագետ Նաիրա Ղահրամանյանը։
«Նպատակն է համախմբել դպրոցականներին, բացահայտել և խրախուսել գիտաճանաչ աշակերտներին»:
Մրցույթը նախ անց է կացվել քաղաքային ու շրջանային փուլով, լավագույն արդյունքներ գրանցած թիմերն այսօր մասնակցել են հանրապետական փուլին: Ստեփանակերտը ներկայացրել է «Խաղաղություն», Ասկերանը՝ «Նորագյուղ», Շուշին՝ «Բյուրեղ», Մարտակերտը՝ «Բեկոր», Հադրութը՝ «Դիզակ» թիմերը : Մարտունու շրջանը ներկայացնող՝ «Շանթ» թիմը Հերհեր գյուղի միջնակարգ դպրոցի 10-12-րդ դասարանի աշակերտներն էին ներկայացնում: Դպրոցի պատմության ուսուցիչ Նվեր Չալյանը կարևորում է նման մրցույթների անցկացումը, այն համարում ևս մի յուրահատուկ ձև՝ հայրենաճանաչություն և հայրենասիրություն սերմանելու համար։ Խաղի ընթացքից գոհ է:
«Խաղը նորմալ է ընթանում, երեխաների ոգևորությունը բարձր է, միայն թե չամաչեն»։
Խաղ-մրցույթի հանրապետական փուլը 3 մասից էր կազմված: Առաջինում յուրաքանչյուր թիմի տրվել է երեքական հարց, յուրաքանչյուր հարցի համար 15 վրկ․ ժամանակ։ 2-րդ փուլում հարցերը ընդհանուր են հնչել, պատասխանել են այն թիմերը, որոնք առաջինն են բարձրացրել իրենց դրոշները։ Պատասխանի համար թիմերն ունեին 1 րոպե: 3-րդ փուլի առաջին ենթափուլում էկրաններին պատկերված էր ԱՀ և ՀՀ հերոսների նկարները։ Մասնակիցները պետք է նշեին ԱՀ հերոսներին,ՀՀ հերոսներին և ԱՀ ու ՀՀ հերոսներին։ Տեսասահիկի տևողությունը 3 րոպե էր, մասնակիցներին լրացուցիչ տրվել է ևս 1 րոպե՝ ներկայացնելու իրենց պատասխանները: Երկրորդ ենթափուլում յուրաքանչյուր թիմի բաժանվել են թերթիկներ, որտեղ նրանք լրացրել են էկրանին հայտնված տողերի հեղինակների անունները: Հարցերը մեծամասամբ Արցախյան շարժման, քառօրյա և քառասունչորսօրյա պատերազմների, Արցախի և Հայաստանի անկախացման գործընթացների մասին էին: Խաղը բարձր մակարդակի վրա է՝ ասում է ԿԳՄՍ նախարարության արտադպրոցական ծրագրերի բաժնի վարիչ Արմեն Պետրոսյանը, նա և՛ կազմակերպչական աշխատանքներով է զբաղվել, և՛ որպես դիտորդ հետևում էր խաղի ընթացքին, գնահատում թիմերի ակտիվությունը:
«Տեսնում ենք, որ կա առողջ մրցակցություն։ Չի բացառվում, որ խաղի ընթացքում վեճեր էլ կլինեն, անհամաձայնություններ էլ։ Բայց փորձառու ժյուրին կգնահատի ամենաարժանիներին»:
Աշակերտների մասնակցությունը այսօրինակ մրցույթների կարևորեց նաև ժյուրիի նախագահ Մելանյա Բալայանը: Այս սերունդն է լավ ապագայի հույսը՝ ասում է։
«Միայն խելացի երիտասարդություն ունենալու մեջ է ցանկացած պետության հաջողությունը, առավելևս Արցախի և Հայաստանի Հանրապետության համար»:
Հանրապետական փուլի հաղթող ճանաչվեց Ասկերանի շրջանը ներկայացնող «Նորագյուղ» թիմը, երկրորդ և երրորդ տեղերը համապատասխանաբար՝ Մարտակերտի «Բեկոր» և Մարտունու «Շանթ» թիմերը: Բոլոր մասնակիցները ԿԳՄՍ նախարարության կողմից ստացել են պատվոգրեր և գրքեր, իսկ հաղթող թիմերը՝ նաև հուշանվերներ։
