Ստեփանակերտի կենտրոնական ավտոկայանում սովորական աշխուժություն է։ Չնայած եղանակային անբարենպաստ պայմաններին միջպետական և ներհանրապետական համարյա բոլոր երթուղիները սպասարկվել են։ Չի սպասարկվել միայն Մուշկապատ համայնքի երթուղին՝ «Արցախ» լրատվականին ասաց Ավտոկայանի փոխտնօրեն Ալբերտ Ավետիսյանը:
«Մուշկապատ-Ստեփանակերտ ճանապարհի մի քանի հատվածներ այսօր դժվարանցանելի էին։ Այդ պատճառով էլ երթուղին չի սպասարկվել»:
Երևան-Ստեփանակերտ երթևեկությունը սկսում է ժամը 8-ից: Ավետիսյանի խոսքով ողջ օրվա ընթացքում անընդհատ հետևվում էին երթևեկության ընթացքին, վարորդների հետ մշտական կապ պահում: Թեկուզ ճանապարհները սառցակալած էին, բայց փորձառու վարորդները ուղևորներին ապահով տեղ կհասցնեն՝ ասում է:
«Վարորդների հետ հեռախոսային կապ ենք հաստատել։ Ասացին, որ արդեն հասել են: Ճանապարհին որևէ խոչընդոտ չի եղել: Ճիշտ է՝ ճանապարհները լավ վիճակում չեն, բայց փորձառու վարորդները կկատարեն իրենց աշխատանքը»:
Եթե հետիոտներին ձյունը հիմնականում ուրախություն է պատճառում, ապա վարորդներին այն լրացուցիչ դժվարությունների առաջ է կանգնեցնում: Կոճողոտ համայնքի միկրոավտոբուսի վարորդը այսօր դժվարությամբ է հասել մայրաքաղաք, չնայած ճանապարհները ժամանակին են մաքրվել:
«Ճանապարհները սառցակալած էին, մի կերպ կարողացանք անցնել այն: Ճանապարհները մաքրվում են , առավոտյան 07:30 ճանապարհները մաքրող մեքենան եղել է Չլդրանում: Ուղղակի տեղումները չէին դադարում»։
Գազով շահագործվող երթուղիները գազի խափանման պատճառով չեն դադարացրել երթևեկությունը։ Դրանք աշխատում են բենզինով։ Ալբերտ Ավետիսյանի խոսքով՝ դրանք Նախիջևանիկ և Պատարա համայնքների երթուղիներն են։ Այս փոփոխությունը երթուղու արժեքի վրա չի ազդել։
