Երևանում առաջիկա օրերին  սպասվում է օդի ջերմաստիճանի բարձրացում՝ 39-ից մինչև 42 աստիճան. հիդրոօդերևութաբանների կանխատեսումներն են։ Պատճառը Արաբական թերակղզու շրջաններից արևադարձային տաք օդային հոսանքների  ներթափանցումն է Հայաստանի տարածք,  ինչի պատճառով հանրապետության գրեթե ողջ տարածքում՝   Արարատյան դաշտում, Արագածոտնի, Վայոց ձորի նախալեռնային գոտիներում օդի ջերմաստիճանի   զգալի բարձրացում է արձանագրվել։ Արցախում նույնպես ջերմաստիճանի բարձրացում է սպասվում՝ ասում է Արցախի հիդրոօդերևութաբանության ծառայության տնօրենի տեղակալ Լաուրա Հովսեփյանը։

«Հանրապետության տարածքը շարունակում է գտնվել Արաբական թերակղզու շրջաններից արևադարձային տաք օդային հոսանքների ազդեցության գոտում, ինչով պայմանավորված նախալեռնային գոտիներում հուլիսի 16-20-ին ցերեկային ժամերին օդի ջերմաստիճանը կհասնի 36-40 աստիճանի»։ 

Դիտարկելով վերջին 10 տարվա եղանակային ցուցանիշները, պատասխանատուն նշում է, որ ջերմաստիճանի ամենաբարձր ցուցանիշը հուլիս-օգոստոս ամիսներին գրանցվել է 2015 թվականին։ Այս տարի ամենաբարձր ջերմաստիճանը դեռևս դիտվել է հուլիսի 12-13-ը։ 

«Այս տարի հուլիսի 12-13-ը Մարտակերտում սպասվում է   38 աստիճան, Մարտունիում՝ 37, Ասկերանում՝ 35, Ստեփանակերտում՝  33 աստիճան։ 2021-ին ամենաբարձր ջերմաստիճանը դիտվել է հուլիսի 19-ին և օգոստոսի 9-ին, Մարտակերտում՝  39-40, Մարտունում ՝ 40-41, Ասկերանում՝ 37-38, Ստեփանակերտում՝ 36 աստիճան։ Ամենաբարձրը դիտվել է 2015 թվականին․ Մարտունիում այն հասել է մինչև 43 աստիճան, Ասկերանում՝ 40, Ստեփանակերտում՝ 38 աստիճան։ 2018-ին Մարտակերտում մինչև 42 աստիճան»։

 Նախալեռնային շրջաններում օդի ջերմաստիճանի բարձրացումը մինչև 35 աստիճան, հովտային շրջաններում՝  մինչև 40, խոսում է  օդերևութաբանական վտանգավոր երևույթների մասին։ Ինչպես օրինակ արևահարության և հրդեհավտանգության մասին։ 

«Այս դեպքերում ուլտրամանուշակագույն ճառագայթման ինտենսիվությունը սպասվում է նորմայից բարձր։ Այդ օրերին խորհուրդ է տրվում ժամը 11-17 ընկած ժամանակաընթացքում խուսափել արևի ուղիղ ճառագայթներից»։ 

Այս օրերին անոմալ շոգ է Եվրոպական մի շարք երկրներում: Այն ավելի ընդգծված  է հատկապես Իսպանիայում, Պորտուգալիայում, Ֆրանսիայում: Այրվում են անտառներ,  վտանգավոր գոտիներից տարհանվել են հարյուրավոր մարդիկ, մեկ մարդ զոհվել է, Իտալիայում սառցադաշտերը հալչում են՝ վտանգ ստեղծելով  զբոսաշրջիկների համար, ԵՄ երկրների մեծ մասը բախվում է սաստիկ երաշտի։ Մեծ Բրիտանիայում օդերևութաբանական ծառայությունը «դեղին» մակարդակի  նախազգուշացում է տվել կիրակի օրը սկսվող շոգին: Օդի ջերմաստիճանը Անգլիայի և Ուելսի մեծ մասում կգերազանցի 35 աստիճանը։ Սպասվում է, որ առաջիկա օրերին ջերմային ալիքը կտարածվի Արևմտյան և Կենտրոնական Եվրոպայի այլ շրջաններում ևս։