Ստեփանակերտի Շտապ բժշկական օգնության կայանը հագեցած է բժշկական պարագաներով, սարքավորումներով: Այս մասին այսօր ամփոփիչ հաշվետվության ժամանակ ասաց գործադիր տնօրեն Լիլիթ Նազարյանը, որը լսելու էին եկել նաև պետական նախարար Արտակ Բեգլարյանն ու Առողջապահության նախարար Միքայել Հայրիյանը: 2021-ը գործադիր տնօրենը նախ թվերով է ներկայացնում: 2021թ. շտապ օգնություն է տրամադրվել 13 000 մարդու 

«Կանչերի թիվը կազմել է 13 հազ. 565, սպասարկվել է 13 հազ. 710 անձ, որոնցից ՝ 18 տարեկաների թիվը կազմել է 690, գյուղական բնակավայրերից ստացվել է 358 կանչ, դժբախտ պատահարները՝ 121 , իսկ իքնադիմելիության թիվը 1502 է»:

 2021-ին դժբախտ պատահարների՝   հետևանքով գրանցվել է 90 մահ, որից 2-ը՝ պատանի: Լիլիթ Նազարյանն ասում է, որ միայն շմոլ գազից   գրանցվել է թունավորման 100 դեպք: Արտակ Բեգլարյանը համոզված է, որ պատկերը  հնարավոր է փոխել՝ ճիշտ քաղաքականություն վարելով. պատասխանատու գերատեսչությունների սերտ համագործակցությունը կարող է բավականին օգտակար լինել: 

«Համոզված եմ, որ շատ դեպքեր կան, որոնք մենք կարող ենք կանխարգելել: Կլինի դա շմոլ գազի,   վթարների,   թե մեկ ուրիշ դեպքի հետ կապված:  Մենք պետք է հասկանանք՝ ինչ որոշումներ ենք կայացնում, ինչ շտկումներ ենք անում: Մի մասը առողջապահության ոլորտում, մի մասը այլ ոլորտներում, որպեսզի այդ դեպքերը կարողանանք գոնե մասնակիորեն կանխարգելել»:

 Մասնագետների պակաս չունի  շտապ բուժօգնության կայանը՝ Արտակ Բեգլարյանի հարցին ի պատասխան ասաց Լիլիթ Նազարյանը:  Սպասարկումն իրականացվում  է  ամենօրյա ռեժիմով: Ասում է՝ օր չկա, որ կանչ չլինի: Հասցնում են:

«Ունենք  14  բժիշկ,  26 միջին բուժաանձնակազմ և  15 վարորդ;  Նաև 2 մայրապետ»:

 Մինչ 44-օրյա պատերազմը Ստեփանակերտի Շտապ բժշկական օգնության կայանը սպասարկում էր 19 համայնքի բնակինչների, այսօր այդ թիվը նվազել է մինչև  10: Մեքենաները բավարարում են լիարժեք սպասարկման համար՝ ասում է գործադիր տնօրենը: 

 «11-ը սարքին վիճակում են: 5 FORD ունենք, 2 UAZ, 1 TOYOTA մակնիշի մեքենա: Եվս  6  մեքենա անսարք է»:

 Շտապ բուժօգնության կայանները պետք է համալրել, կարծում է Առողջապահության նախարար Միքայել Հայրիյանը: Առաջիկայում նախատեսվում է  շտապ բուժօգնության կայաններ ունենալ նաև շրջաններում: Մանրամասնում է: 

«Բարեփոխումների կարիք ունի Շտապ բուժօգնության կայանը: Նախատեսում ենք Գետավանից սկսած մինչև Աղավնո կայաններ տեղադրել, քանի որ, երբ անհրաժեշտություն է լինում նման դեպքերում սպասարկում է Ստեփանակերտի կայանը, ինչը մեծ ծանրաբեռնվածություն է նաև անձնակազմի համար»:

 Գործադիր տնօրեն Լիլիթ Նազարյանի բարձրաձայնած հաջորդ խնդիրը շտապ բուժօգնության մեքենաների տեղաշարժման մասին էր: 

«Ազդանշանները տեսնելով  վարորդները չեն զիջում շտապ բուժօգնության մեքենաներին»:

 Արտակ Բեգլարյանը  հարցին՝ առաջարկով պատասխանեց: 

«Վիդեոռեգիստրատոր տեղադրեք մեքենաներում: Բարդ չէ: Դրանից հետո լրատվամիջոցներով կհայատարարվի, որ հենց այդ պատճառով տուգանվել են մարդիկ: Դրանից հետո քիչ-քիչ մարդկանց մոտ կսկսի պատասխանտվության զգացումը բարձրանալ»:

 Ահարոն Մելքումյանը սանիտար-վարորդ է: Երկար տարիների աշխատանքային փորձ ունենալով Ստեփանակերտի Շտապ բժշկական օգնության կայանում,   մեկ խնդրի վրա է հրավիրել ներկաների ուշադրությունը, կապված  թաղամասերում  հասցեների փոփոխության  հետ: 

«Ծայրամասային թաղամասեր կան, որտեղ հասցեները ամիսը մեկ անգամ փոխվում են: Գիշերը, երբ կանչ ենք ունենում, հասնում ենք տեղ և չենք կարողանում կողմնորոշվել որ տունն է, որովհետև նախորդ անգամ եկել ենք ուրիշ թիվ էր գրված, հաջորդ անգամ գալիս ենք՝ թիվն արդեն փոխված է լինում: Քաղաքապետարանը գոնե մեզ տեղեկացնի, որ փոխել են հասցեն»

«Գրավոր առաջարկների մեջ Դուք  պարոն Հայրիյանին կուղղեք այդ առաջարկը: Մենք գրավոր ընթացակարգով Ստեփանակերտի քաղաքապետարան կուղարկենք, որպեսզի իրենք հաշվի առնեն, եթե պետք լինի իրավական ակտ էլ կընդունենք»:

 Նախորդ տարվա ընթացքում Շտապ բուժօգնության կայան կորոնավիրուսով վարակման 406 դեպքի մասին կանչ է ստացվել, բուժառուներից 174-ը տեղափոխվել են հիվանդանոց: Այս թեմայի շրջանակում Լիլիթ Նազարյանն իր դժգոհությունն է հայտնել ԱԻՊԾ-ը: Ասում է՝ լինում են դեպքեր, երբ բուժառուին տեղափոխելու հարց է առաջանում և բժշկական անձնակազմը ֆիզիկապես ի վիճակի չի լինում իրականցնել դա: Նման դեպքերում ԱԻՊԾ-ին դիմում: Ստանում են հետևալ պատասխանը. 

«Եթե շտապ բուժօգնությունը կանչ է տալիս ԱԻՊԾ-ին, նրանց կարգավարը մեզ ասում է, որ եթե կորոնավիրուսային դեպք է, ապա մեր անձնակազմը չի կարող գալ և օգնել»:

 Պետնախարարն ու առողջապահության նախարարը խոսատացան դիմել գերատեսչության ղեկավարին, խնդրին օպտիմալ լուծում գտնելու համար: 2022-ին բարեփոխումներ կլինեն շտապ բուժօգնության ոլորտում Հանրապետության բոլոր շրջաններում: Քննարկվել են նոր կայանների տեղադրման, կադրերի վերապատրաստման և տեխնիկական զարգացման հարցեր: Հնարավոր է՝ Ստեփանակերտի շտապ բժշկական օգնության կայանը ապագայում նաև նոր, հարմարավետ շենքային պայմաններ ունենա: