Նոյեմբերի 24, 2024
Երեկ Ստեփանակերտի Ս. Աստվածածնի հովանու Մայր տաճարի կիրակնօրյա պատարագը տարբերվում էր․ առաջին անգամ Արցախի թեմում Ն. Ս. Օ. Տ. Տ. Գարեգին Բ Ամենայն Հայոց Կաթողիկոսի օրհնությամբ և Արցախի թեմի առաջնորդ գերաշնորհ Տեր Վրթանես եպիսկոպոս Աբրահամյանի ձեռամբ կատարվեց քահանայական ձեռնադրություն: ⠀ Սուրբ պատարագին զուգահեռ Վրթանես Սրբազանը քահանայության է կոչել բարեշնորհ Գոռ սարկավագ Գյուրջյանին` մեռոնով օծելով նրան, շնորհելով հոգևոր նոր անուն: Գոռ սարկավագն այլևս իր ծառայությունը Հայ առաքելական սուրբ եկեղեցում շարունակելու է որպես Վաչագան քահանա Գյուրջյան՝ ի պատիվ Արցախի եկեղեցանվեր և ազգանվեր արքա Վաչագան Բարեպաշտի: ⠀ Իր խոսքում թեմակալ առաջնորդը շնորհավորեց և իր երախտագիտությունը հայտնեց Հայոց Հայրապետին, ապա շնորհավորեց նորաօծ Տեր Հորը և հավատացյալներին․
«Փոփոխություն տեղի ունեցավ, հին մարդը գնաց, նորը եկավ։Աստծո աներեևույթ ներկայությամբ, ձեր վկայությամբ և մեր միջնորդությամբ ահա այս աստիճաններով հին մարդը՝ Գոռ սարկավագ Գյուրջյանը բարձրացավ, և այստեղ մեր հայրերի սրբազան կանոնների, աղոթքների ու շարականների ներքո Սուրբ հոգու շնորհները իջան նվիրյալի ամբողջ էության վրա։ Գոռ սարկավագի ձեռնադրության առիթով շնորհավորում եմ բոլորիս»։
Գոռ սարկավագի օծումը սպասված էր՝ ասում է Սրբազանը, Նա մանկուց սպասավորություն էր անում եկեղեցում, սովորել է Գևորգյան ճեմարանում և բարձր գնահատականներով ավարտելով վերադարձել՝ իր ծառայությունը շարունակելու Արցախում։ Տեր Վաչագան քահանան իր զգացողություններով կիսվեց մեզ հետ։
«Քահանայության կարգին արժանանալը միանգամից և՛ մեծ ուրախություն է, և՛ մեծ պատասխանատվություն՝ կրելու Քրիստոսի լուծը և դառնալու Քրիստոսի ծառան ժողովրդի առաջ: Այսօր, ի տես ժողովրդի, մենք խոստում տվեցինք ծառայելու Քրիստոսին: Սրանից ավելի մեծ խորհուրդ գոյություն չունի: Մինչ այդ էլ որպես քրիստոնյա մեր կոչումն էր ծառայել Քրիստոսին, սակայն այսօր պատասխանատվության չափը մեծացել է»:
Հուզված էր նաև նորաօծ Վաչագան քահանայի մայրը՝ տիկին Ռուզաննան։ Գոռի ընտրությունը ընկալելի ու սպասելի էր ծնողների համար․ նրանք այդ հարցում որդու անվերապահ աջակիցներն են եղել։ Գոռը մեծացել է աստվածավախ, հավատացյալ ընտանիքում։ «Փոքրուց նվիրված է եղել Աստծուն, հոգևոր դաստիարակություն է ստացել, սպասավորություն է արել Մարտակերտի ս․ Կարապետ եկեղեցում, -պատմում է մայրը։-Կարգապահ, համեստ երեխա էր, երբևէ որևէ հարցով դպրոցում կամ ընտանիքում չի անհանգստացրել»։
«Միշտ երազել եմ, որ ամուսնացյալ հոգևորական դառնա, այսօր , փառք Աստծո, ինքն արժանացավ այդ ձեռնադրությանը, ես շատ հուզված եմ, չգիտեմ ինչ է կատարվում, որովհետև Գոռ սարկավագն արդեն Վաչագան քահանա է, Վաչագան բարեպաշտի անունն է կրում, և ես ցանկանում եմ, որ նա նմանվի աստվածահաճո արքային, և իր ամբողջ կյանքը նվիրաբերի իր ժողովրդին, Աստծուն։ Գոհ և շնորհակալ եմ Սրբազան հորից, որ բարձր գնահատեց նրա ծառայությունը և արժանացրեց ձեռնադրությանը»։
Վաչագան քահանան մինչև ձեռնադրվելը ծառայում էր ԱՀ Զինված ուժերում որպես գնդերեց։ Եվ գուցե պատահական չէ, որ նրա օծումը տեղի է ունեցել նոյեմբերի 13-ին, Զինված ուժերի հոգևոր առաջնորդության օրը։
