Այսօր՝ կեսօրից հետո, ադրբեջանական դիրքերից կրակահերթեր են արձակվել Մարտունու շրջանի Խնուշինակ գյուղի ուղղությամբ՝ հայտնում են ԱՀ ՊՆ մամուլի ծառայությունից: Դեպքի մասին «Արցախ» լրատվականին  մանրամասներ է հայտնել Խնուշինակի համայնքապետ  Կամո  Մուրսալյանը՝  նշելով, որ   իրավիճակը ժամը 16:00-ի դրությամբ  հարաբերականորեն կայուն է: 

«Ժամը 14:10-ից  մինչ 15:10-ի սահմաններում հակառակորդը 82 մմ տրամաչափի ականանետից 2 արկ է արձակել  է գյուղատնտեսական աշխատանքներ կատարող մարդկանց ուղղությամբ, ինչի պատճառով գյուղացիները լքել են տարածքը, որից հետո  2 արկ էլ կրակել են խաղողայգում աշխատող գյուղացիների ուղղությամբ: Այս պահի դրությամբ իրավիճակը հանգիստ է, ժողովորդի մոտ խուճապ չկա»: 

Այսօր  թշնամին կրակել է նաև Թաղավարդի ուղղությամբ։ Դա տեղի է ունեցել ժամը 11:10-ի սահմանում: Տուժածներ չկան՝ փոխանցում է Մարտունու շրջվարչակազմի ղեկավար Էդիկ Ավանեսյանը.

«Թաղավարդ գյուղի հարակից դաշտում աշխատող գյուղտեխնիկայի աշխատանքը խափանելու նպատակով հակառակորդը հրաձգային զենքից արձակել է 7 կրակոց: Տուժածներ չկան»: 

Երեկ` կեսգիշերն անց   հակառակորդը թիրախավորել է Ասկերանի շրջանի Խրամորթ գյուղը՝  կրկին   կիրառելով  ականանետ՝    փաստում է    Խրամորթի համայնքապետ Զորիկ Աբրահամյանը.  

«Երեկոյան 12:15-ին Ադրբեջանի կողմից կրակել են 60մմ տրամաչափի ականանետով:  2 արկ անցել է գյուղի գլխավերևով: Ականի պայթյունների հետևանքով վնասներ չեն եղել: Տուժողներ չկան»:

 Այս պահին իրավիճակն  հանգիստ է  նաև Խրամորթում: Գյուղում տիրող տրամադրությունների մասին է պատմում     համայնքապետը:  

«Ամեն ինչ նորմալ է: Աշակերտները դասի են գնում: Մարդիկ իրենց գործերով են զբաղված: Ոչ մի խուճապ չի եղել ու չի լինի»:  

Հրադադարի խախտման  բոլոր այս դեպքերի մասին հաղորդվել է ՌԴ խաղաղապահ զորակազմի հրամանատարությանը՝ հայտնում են ԱՀ ՊԲ-ից։   Ավելի վաղ  Ադրբեջանի Պաշտպանության նախարարությունը հայտարարություն էր տարածել՝ հայկական կողմին մեղադելով հրադադարի ռեժիմի  խախատման մեջ:    ԱՀ ՊԲ-ից հայտնել են, որ այս հայտարարությունը ոչ մի կապ չունի իրականության հետ:  Արցախի ՊԲ    կրակ չի բացել ադրբեջանական դիրքերի ուղղությամբ։