Նոյեմբերի 23, 2024
Բերդաշենում անցկացված ընտրությունը արտահերթ էր: Համայնքի նախկին ղեկավարի վաղաժամ մահը ընտրության անհրաժեշտություն առաջացրեց: Երեկ կայացած ընտրությանը առաջադրվել են Կարո Հարությունյանը, Նվեր Զարգարյանը և Գեորգի Պողոսյանը: Վերջինիս, ինչպես ինքն է ասում, առաջադրվել համոզել են ընկերներն ու բարեկամները: Մեր զրուցակիցը լավատեղյակ է գյուղի խնդիրներին. ջրամատակարարում, ճանապարհներ: Այս խնդիրներց բացի Գեորգին հրատապ է համարում նաև զարգացման ծրագրերի իրականացումը երեխաների ու երիտասարդների համար, որոնք միանգամից մի քանի հարց կլուծեն:
«Ես ունեմ փոքր բալիկ, որի զարգացման համար մտածում եմ: Գյուղում ո՛չ սպորտկոմպլեքս ունենք, ո՛չ արվեստի ու մշակույթի կենտրոն, որը կբացահայտի երեխային և այս երեխաները գյուղի անունը բարձր կպահեն: Նման ծրագրեր իրականում շատ կան»:
Մեծ նահատակ, Փոքր նահատակ, Սուրբ, Աղջկաբերդ. Բերդաշենում սրբավայրեր ու պատմական հուշաձանները բազմաթիվ են: Գեորգին կարևորում է նաև պատմական ժառանգության պահպանության հարցը: Ասում է՝ նաև մշակույթով պետք է պայքարել թշնամու դեմ:
«Բազմաթիվ կոթողներ ունենք, որոնք տարիների ընթացքում երևի թե մոռացության էին մատնվել: Աշխատաքներ կատարվել ու կատարվում են պատմական ժառանգությունը վերականգնելու համար: Ասում են չէ՞ պայքարենք թշնամու դեմ, թշնում դեպ ինչի՞ համար ենք պայքարում: Որպեսզի հայ մնանք, իսկ հայ մնալու համար ի՞նչ է պետք: Որ բերդաշենցին իմանա գյուղի պատմական ժառանգության մասին: Մենք մեզանից փոքր սերնդին պետք է անընդհատ բացատրենք, հասկացնենք, որ մենք այ այսպիսի նախորդներ ենք ունեցել, որոնք մեզ այսպիսի ժառանգություն են թողել և փորձենք շարունակել նրանց գործը»:
Ինչպես Արցախի գրեթե բոլոր գյուղերում Բերդաշենում ևս հողի հետ աշխատող մարդիկ շատ են: Պատերազմից հետո մեծ ցանքատարածություններ են մնացել թշնամու վերահսկողության տակ: Չնայած՝ այգիները գտնվում են թշնամու դիրքերից մի քանի մետր հեռավորության վրա, բերդաշենցիները շարունակում են աշխատել այնտեղ: Գյուղացիներից շատերը հողի հետ կռիվ տալով են ապրում: Վերջին ամռանը ջրի պակասը մեծ խնդիրներ էր առաջացրել գյուղատնտեսությամբ զբաղվողների համար: Գերոգի Պողոսյանի խոսքով՝ այդ խնդրին հնարավորինս շուտ լուծում պիտի տրվի:
«Այսօր մենք կանգնած ենք ջրի հիմնախնդրի առաջ: Բերդաշենում տնտեսության հիմական ճյուղը գյուղատնտեսությունն է, իսկ գյուղատնտեսության մեջ առանց ջրի բացառված է որևէ առաջընթացի մասին խոսել»:
Եթե պետական բյուջի հաշվին չստացվի լուծել խնդիրները, Գեորգի Պողոսյանը խոստանում է սրանց լուծում տալ մասնավոր անձանց ներդրումների հաշվին: Բերդաշեն համայնքի նոր ղեկավարի ծրագրերը բազմաթիվ են ու տարաբնույթ, բայց բոլորը մի նպատակի են ուղղված՝ գյուղի զարգացմանը: Շուրջ 40 տոկոս ձայն հավաքած համայնքապետի ծրագրերը բերդաշենցիները ողջունում են, բայց և սպասում դրանց իրագործմանը: Նրանք խոստանում են պահանջատեր լինել:
