Նոյեմբերի 22, 2024
Շուշիի Խ. Աբովյանի անվան դպրոցը և Մանկապատանեկան ստեղծագործական կենտրոնը նոր շենք կունենան
By Վիկտորյա Սարգսյան
Նոյեմբերի 05, 2022
Ստեփանակերտի Անդրանիկ փողոցի հարակից տարածքում այս տարվա հունիսից շինարարական ակտիվ աշխատանքները չեն դադարում: Վաղ առավոտյան բանվորները տեղում են, բետոնախառնիչ մեքենան՝ գործի դրված: Շենքը վերանորոգվում և վերապրոֆիլավորվում է՝ որպես ուսումնական հաստատություն և ստեղծագործական կենտրոն գործելու համար։ Այնտեղ նախատեսվում է տեղակայել Շուշիի Խաչատուր Աբովյանի անվան հիմնական դպրոցն ու «Շուշիի մանկապատանեկան ստեղծագործական կենտրոն» ՊՈԱԿ-ը։ «Վյաչեսլավ» ըննկերության աշղեկ Կարեն Հակոբյանը շինաշխատանքների ընթացքն է ներկայացնում:
«Հունիսի վերջին սկսել ենք աշխատել: Հիմա արդեն ներքին հարդարման փուլում ենք: Արտաքին հարդարումը երևի մի քիչ կուշանա՝ կապված ջրագծերի և կոյուղիների տեղադրման հետ: Բայց, եթե ամեն ինչ լավ լինի, դա էլ կհասցնենք: Շենքը կար, մենք պարզապես վերանորոգում ենք, ձևափոխում դպրոցի: Շենքը եռահարկ է, կիսանկուղային: Մոտ 60 սենյակ կա: Շենքի մի հատվածում արվեստի դպրոց կլինի»:
Շենքը կունենա 3 մուտք՝ դպրոցի, նախակրթարանի և ստեղծագործական կենտրոնի համար: Աշղեկի խոսքով՝ աշխատուժի պակաս չեն ունեցել: Գործը գնում է իր հունով: Արդյունքում միջազգային ստանդարտներին համապատասխան դպրոց կունենանք:
«Առաջին հարկում ենք: Այս կողմում նախակրթարանը կլինի: Ճաշարանը նկուղային հարկում է: Դասարաններ են, տնօրենի սենյակ, ուսուցչանոց: Սանհանգույցները կան, ամեն հարկում մի քանի հատ»:
Շինաշխատանքներն իրականացվում են պետական բյուջեի ֆինանսավորմամբ: Աշղեկ Կարեն Հակոբյանի խոսքով՝ արդեն տարվա վերջում շենքը շահագործման կհանձնվի:
