Երեկ տեղի ունեցած ԱԺ լիագումար նիստի երկրորդ հատվածում քննարկված   հարցերից էր Պետական պաշտոններ զբաղեցնող անձանց վարձատրության մասին օրենքում փոփոխություններ և լրացումներ կատարելու մասին օրինագիծը։ Ֆինանսների նախարարի տեղեկացմամբ հանձնաժողովների և խմբակցությունների նիստերում պատգամավորների հնչեցրած առաջարկներն ընդունվել և ներառվել են նախագծում։ Գլխադասային հանձնաժողովի կողմից օրինագիծը նախապես արժանացել է  դրական եզրակացության, բայց քանի որ օրինագիծը ներկայացվել էր բյուջեի նախագծի հետ միասին, ուստի այն քվեարկության է դրվելու դեկտեմբերի 23-ին՝ պետական բյուջեի հետ։ Լիագումար նիստի օրակարգային հարցերից մեկը  «Ճանապարհային երթևեկության անվտանգության ապահովման»,  «Պետական տուրքի»  և  «Բնապահպանական վճարների դրույքաչափերի» մասին  օրենքներում փոփոխությունններ կատարելու մասին»  օրինագծերի փաթեթն էր։ Այս օրինագծերի շուրջ խորհրդարանում բուռն քննարկումներ են ընթացել. այն երկար ժամանակ գտնվում էր Ազգային ժողովում և նոյեմբերի 28-ին, կանոնակարգի համաձայն,  վերադարձվել էր գրավոր առաջարկների ներկայացման փուլ։ ԱՀ Տարածքային կառավարման և ենթակառուցվածքների նախարար Հայկ Խանումյանի խոսքով՝ նախորդ քննարկումից առ դեկտեմբերի 16-ը ստացել են ընդամենը մեկ առաջարկություն՝ բաղկացած երկու կետից: Առաջարկությունը ներկայացրել էր պատգամավոր Արեգ Ավագյանը: Այն ընդունվել և ներառվել է նախագծում։ Օրինագծերի փաթեթը ընդունվել է 27 կողմ ձայնով։ Նախագծի վերաբերյալ մտքերի փոխանակությամբ հանդես են եկել Մետաքսե Հակոբյանն ու Դավիթ Գալստյանը: Հայկ Խանումյանը լրացուցիչ պարզաբանումներ է տվել:

«Տեխզննումը հանելու դեպքերը ուսումնասիրվել են: Շատ երկրներում այն կապված է ապահովագրության հետ. տեխզննումը հանում են՝ այդ վճարը ավելացնելով ապահովագրական վճարի մեջ: Հետևաբար այդ վճարի հանումը ֆինանսական շահ չի տալիս քաղաքացուն: Երկրորդը  ունի անվտանգային բաղադրիչ: Այն հնարավորություն  է տալիս հստակ բազա ունենալ  և վերահսկողություն իրականացնել: Սա շատ կարևոր է, հատկապես մեր պարագայում, երբ թշնամու մոտ շատ պետհամարանիշներ են մնացել: Ինչ վերաբերում է հեռավոր շրջաններին, հատկապես Մարտակերտին. մոբիլ տեխզննման կետերի տեղադրման պրակտիկա կա: Եթե պայմանները ներեն, արտոնյալ վարկավորմամբ, մասնավոր հատվածի ներգրավմամբ,  կարելի է գործարկել ծրագիրը»:  

Տեղական տուրքերի ու վճարների և Հանրային ծառայութունների կարգավորման պարտադիր վճարների մասին  օրենքներում փոփոխություններին խորհրդարանը միաձայն կողմ է քվեարկել։ ԱԺ լիագումար նիստին օրենքների նախագծերի փաթեթ է ներկայացրել Ներքին գործերի նախարարությունը. այն ներառում է փոփոխություններ «Ոստիկանության զորքերի»,  «Ոստիկանությունում ծառայության»,  «Պաշտպանության մասին», «Հայրենիքի պաշտպանության համար զոհվածների հիշատակի հավերժացման մասին» օրենքներում: Փաթեթը, որը ներկայացրել է ոստիկանապետ Արտեմ Հարությունյանը, միաձայն ընդունվել է առաջին ընթերցմամբ: Գլխադասային հանձնաժողովի առաջարկությամբ, երկրորդ ընթերցման համար նախատեսված գրավոր առաջարկների ժամկետը սահմանվել է մինչև դեկտեմբերի 21-ը ներառյալ։ Պատասխանելով Ոստիկանության զորքերի մասին  հարցին, Արտեմ Հարությունյանն ասել է.

«Ոստիկանության զորքերը նոր կառույց է, նոր համալրում է իրականցվելու: Այն չի ստեղծվելու Ոստիկանության որևէ բազայի վրա»: 

«Քաղաքացիական ծառայության մասին օրենքում փոփոխություններ կատարելու մասին» օրինագիծը  Խորհրդարանը միաձայն է ընդունել։ ««Հեռուստատեսության և ռադիոյի մասին» օրենքում փոփոխություններ կատարելու մասին» օրենքի նախագիծը ԱԺ լիագումար նիստ էր մտել բացասական եզրակացությամբ: Օրենքի փոփոխություններին խորհրդարանում միանշանակ չէին արձագանքել. վերապահումներ կային Հանրային հեռուստառադիոընկերության խորհրդի անդամների աշխատանքի արդյունավետության վերաբերյալ՝ այն հասարակական հիմունքներով դարձնելու, եթերաժամի ծրագրային ապահովման և այլ հարցերի հետ կապված: Նախագծի հեղինակը պնդում է, որ փոփոխություններն անհրաժեշտ են:

«Հեռուստատեսության և ռադիոյի մասին օրենքում փոփոխություններ կատարելու մասին»  օրինագծի ընդունումը պայմանվորված է հաղորդումների եթերաժամերի առկա անհամամասնությունների վերացմամբ, և ղեկավար մարմնի գործառույթների հստակեցմամբ: Նախագծով առաջարկվում է ազգային փոքրամասնությունների լեզուներով ծրագրերի ու հաղորդումների հեռարձակման՝ օրական մինչև 10 րոպե տևողությունը ավելացնել մինչև օրվա եթերաժամի 20 տոկոս: Առաջարկվում է նաև Հեռուստառադիոընկերության խորհրդի անդամների թիվը 3-ից դարձնել 5 և նրանց լիազորությունների կատարումը սահմանել հասարակական հիմունքներով: Կառավարությունից ստացել ենք երկու  առաջարկ, որը ներառվել է նախագծում»:

 Օրինագծի վերաբերյալ մինչ այդ կայացած խորհրդարանական քննարկումների ժամանակ դեմ դիրքորոշում ընդունած պատգամավորները մնացել են իրենց կարծիքին: Նախագիծն օրենքի ուժ է ստացել ձայների  18 կողմ, 6 դեմ  հարաբերակցությամբ։