«Հացի արտադրամասի հիմնում Ծաղկաշատ գյուղում, ծրագրի հեղինակ Անահիտ Կասյան»:  Երազանքի հետևից Անահիտ Կասյանը գնացել է ուղիղ 5 տարի:  Այն գուցե այդպես էլ երազանք մնար, եթե չլիներ «Բարձր տեխնոլոգիաների և ռազմավարական պլանավորման կենտրոն» հիմնադրամը:  Ընտանիքի համար խմորեղեն պատրաստելու ժամանակ ծնված գաղափարը բիզնես նախագիծ դարձավ հենց Հիմնադրամի աջակցության շնորհիվ: 

«Խոհարարությունն իմ հոբբին է: Միշտ երազել եմ իմ սեփական արտադրամասն ունենալու մասին: Այսօր այն իրականություն է դառնում, և ես շատ ուրախ եմ, որ հասել եմ դրան»: 

Հիմնադրամի արտաքին կառույցների հետ կապերի բաժնի պետ Էմմա Պետրոսյանի խոսքով՝   ծրագրերի ֆինանսավորումը  փուլային եղանակով է կատարվում: 

«Սա ֆինանսավորման առաջին փուլն է: Եթե այս փուլում տրամադրված գումարները ծառայեն իրենց նպատակին, շահառուները կֆինանսավորվեն նաև երկրորդ փուլով, հակառակ դեպքում՝ ֆինանսավորում չենք իրականացնի»:

  Աջակցությունը հնարավոր է դարձել  2021 թվականին իրականացված առաջին՝  «Կանգնի՛ր Արցախի կողքին» հեռուստամարաթոնի շնորհիվ:  15 օրվա ընթացքում հավաքված գումարի չափը ներկայացնում է Էմմա Պետրոսյանը. 

«Այս պահի դրությամբ հիմնադրամում հավաքագրված գումարի չափը կազմում է 92 137 903 ՀՀ դրամ, 1000 եվրո և 25 050 ԱՄՆ դոլար: Շնորհակալ ենք բոլորին, որոնք իրենց ներդրումն են ունեցել այս գործում»:

 Բիզնես ծրագրերի ֆինանսավորումը շարունակական է լինելու: Այսօր առաջին փուլով դրամական աջակցություն  է տրամադրվել  10 բիզնես-ծրագրի: