Հանրապետության նախագահի գլխավորությամբ բարձրաստիճան պաշտոնյաներ ծաղիկներ են խոնարհել հայրենիքի պաշտպանության մարտերում  ոստիկանության անմահացած ծառայողների հիշատակը հավերժացնող հուշարձանին և հուշանկյան պատվանդանին: Օրհներգ, մեկ րոպե լռություն. պարտադիր այս մեկնարկից հետո արդեն սկսվեց մասնագիտական օրվան նվիրված պաշտոնական միջոցառումը: Երկրի ղեկավարը, շնորհավորական խոսքում կարևորելով համակարգի աշխատողների գործունեությունը պատերազմի ու խաղաղության պայմաններում, նշել է, որ երկրի անվտանգության ապահովման գործում ոստիկանները մեծ դեր ունեն: 

«Առաջին հերթին մեր ապագան պայմանավորված է ոստիկանության գործունեությամբ: Եթե մենք արտաքին վտանգների առումով ունենք այլ երաշխիքներ, ապա ներքին մեր անվտանգությունը, որը հենց երկրի հիմքն է,  պետք է հաջողի նաև ապագայում, քանի որ դա կարևոր և առանցքային ծառայություն է:  Պետք է պահպանել ներքին անվտանգությունը: Պետք է լինենք օրենքի նկատմամբ շատ խիստ, խստապահանջ կատարենք օրենքի պահանջները: Պետք է պատժվեն նրանք, որոնք փորձում են խարխլել մեր պետության հիմքերը և փորձում են խանգարել այս ծանր շրջանում մեր երկրի ներքին անդորրը»:

 Անցած տասնամյակների ընթացքում համակարգում բազմաթիվ փոփոխություններ են եղել՝ սկսած խորհրդային միլիցիայի տարիներից մինչև ՆԳ նախարարության առաջ բերած բարեփոխումներ: Բայց ոստիկանության ծառայողի գործառույթը անփոփոխ է մնացել. այն է՝ պահպանել կայուն հասարակական կարգը, վերահսկել հանրապետության օպերատիվ իրավիճակը, անզիջում ու համակարգված աշխատանքներ իրականացնել հանցավորության դեմ պայքարում:  ՆԳ նախարար Կարեն Սարգսյանն է  շնորհավորում համակարգի աշխատողներին:  Գաղտնիք չէ, որ ոստիկանները շատ հաճախ  կյանքին և առողջությանը սպառնացող պայմաններում են իրականացնում իրենց գործառույթները: Արցախյան երրորդ պատերազմում ոստիկանության համահավաք գումարտակի անձնակազմից անմահացել են 11 ծառայող: Մեզ առաջ է մղում այն գիտակցումը, որ մահը քաջերի հարությունն է՝ ասում է նախարարը: 

«24 ժամ շարունակ Արցախի ոստիկանը բնակչության կողքին է: Մեր հայրենակիցներն էլ գիտեն, որ նա իրավակարգի, իսկ հարկ եղած դեպքում՝ առաջնագծի մարտիկ է: Երախտագիտության խոսքս եմ հղում արտաքին ծառայություն իրականացնող ստորաբաժանումների աշխատակիցներին: Հանրությունը ձեզանով է ընկալում և չափում ամբողջ համակարգի գործառույթը: Շնորհակալություն օպերատիվ ստորաբաժանումների ծառայողներին: Գիշեր ու զօր նրանք պայքար են մղում հանցավորության դեմ: Այդ աշխատանքը հաճախ դուրս է մնում հանրության տեսադաշտից, բայց արժանի է մեծ գնահատանքի: Համագործակցության համար Ներքին գործերի նախարարության անձնակազմի և անձամբ իմ անունից շնորհակալություն եմ հայտնում երկրի օրենսդիր, գործադիր և դատական իշխանություններին, զինված ուժերին, ռուսական խաղաղապահ զորակազմի հրամանատարությանը, իրավապաշտպան կազմակերպություններին, Հայաստանի Հանրապետության ոստիկանության համակարգին և Արցախի ոստիկանության վետերաններին»: 

Կարեն Սարգսյանի խոսքով՝ արդյունավետ բարեփոխումների իրական ճանապարհով երկրի բարձրագույն իշխանությունը և ՆԳ նախարարությունը այսուհետ ևս անելու են հնարավորը՝ ոստիկանի հեղինակության բարձրացման, ոստիկանության ծառայողի գիտելիքների կատարելագործման ուղղությամբ: Ոստիկանության համար կարևոր է Արցախի կառավարության և ՆԳՆ նախարարության աջակցությունը՝ համակարգում կատարվող բարեփոխումների համար: Ոստիկանության պետ, գնդապետ Արտյոմ Հարությունյանի խոսքով՝ կադրային, տեխնիկական և մասնագիտական վերազինումն ավելի է բարձրացնում կառույցի հեղինակությունը: 

«Ուրախ եմ արձանագրել, որ հատկապես վերջին տարիներին հասարակության վստահությունը ոստիկանի հանդեպ մեծացել է: Սա, միանշանակ, նվիրված աշխատանքի արդյունք է, քանի որ ոստիկանի ուսերին է դրված հասարակական կարգի պահպանության, երկրի ներքին անվտանգության ապահովման, հանցագործությունների կանխման, բացահայտման և անվտանգ միջավայր ձևավորելու պատասխանատու գործը։ Հանրապետությունում օրեցօր ընդլայնվում է ոստիկանության ներկայությունը: Սկսած սահմանամերձ բնակավայրերից՝ պարեկային ծառայությունն արդեն դարձել է ոստիկանության կայացած օղակներից մեկը։ Համակարգի կենտրոնական ու տարածքային ստորաբաժանումների աշխատանքն արագ ու օպերատիվ կազմակերպելու և արդյունավետությունը բարձրացնելու ուղղությամբ՝ բոլոր ծառայությունների գծով գործուն մեխանիզմներ արդեն ձեռնարկվել են։  Սիրելի՛ գործընկերներ, յուրաքանչյուրիս վարքագիծն ու կերպարը  ոստիկանության ընդհանրական կերպարի ու բարոյականության մի մասն է: Մեր բարեվարքությամբ ու օրինակով արժանի լինենք մեր ժողովրդին: Մասնագիտական օրվա առթիվ ջերմորեն շնորհավորում եմ բոլորիս, մաղթում քաջառողջություն, նորանոր հաջողություններ»:

 Միջոցառմանը համակարգի մի խումբ աշխատակիցներ նախագահի, պետնախարարի, ՊՆ և ՆԳ նախարարների, ԱՀ և ՀՀ ոստիկանապետերի ու այլ գերատեսչությունների ներկայացուցիչների կողմից արժանացել են բարձր պարգևների: Օրվա առթիվ  համակարգի մի խումբ ծառայողների հյուրընկալել և պարգևների է արժանացրել նաև Ստեփանակերտի քաղաքապետ Դավիթ Սարգսյանը :