Մարտի 28, 2024

Հանուն նոր մայիսների. Ստեփանակերտում մեծ հանրահավաք է կազմակերպվել

By Ասպրամ Ավանեսյան Մայիսի 09, 2023

Հազարավոր մարդիկ, րոպեական լռություն, տերունական աղոթք, հայկական եռագույններ, հայրենասիրական երաժշտություն, կոչեր, ազգային երգ ու պար. Վերածննդի հրապարակում ուրախությունն ու թախիծն այսօր կողք կողքի էին, մի կողմից` նախկին փառավոր հաղթանակների և ձեռքբերումների բերկրանքը, մյուս կողմից` ներկա իրողությունը` գոյաբանական վտանգ, պետության առջև ծառացած ներքին և արտաքին մարտահրավերներ: Իհարկե` ներկան չի կարող մոռացության մատնել անցյալի մեր փառավոր հաղթանակները, բայց ներկան իր խաղն է թելադրում, հրամայում` անցյալից դասեր քաղել և առաջ շարժվել: Չնայած բոլոր աշխարհաքաղաքական և գլոբալ գործընթացներին, արցախցին համոզված է, որ ինչպես արցախյան շարժման ժամանակ, այնպես էլ հիմա, յուրաքանչյուրիցս է կախված մեր ապագան: Հատկապես երիտասարդների ակնքալիքներն են մեծ այս հանրահավաքից` ասում է Լաուրա Գրիգորյանը, ով եկել էր իր ուսանող ընկերների հետ մասնակցելու մեծ իրադարձությանը: 

«Հանրահավաքի նպատակը, իմ կարծիքով, ժողովրդին համախմբելն է, համախմբված ոգի ստեղծելն է: Ճիշտ է` հասկանալի պատճառնելով այսօր մայիսյան եռատոնը մենք ամբողջ սրտով չենք նշում, բայց նաև չպետք է մոռանանք, որ մենք ունեցել ենք փառավոր հաղթանակներ: Մենք պետք է մեր մտածելակերպը փոխենք հենց այդ ուղղությամբ, դեպի հաղթելը և ավելի շատ կենտրոնանանք հաղթելու վրա»:

 «Ո՛Չ Արցախի էթնիկ զտմանը» շարժման երիտասարդներին միավորել է հայրենիքի գաղափար: Մենք չենք կարող լուռ և անտարբեր հետևել, թե ինչպես են մեզնից խլում մեր հայրենիքը` ասում են: Մի քանի օրվա ընթացքում ավել քան 120000 հայ իր ստորագրությամբ «ոչ» է ասել Ադրբեջանի էթնիկ զտմանը: Ստորագրահավաքը դեռ շարունակվում է: Կազմակերպիչները հետագա անելիքներն են ներկայացրել: 

«Այդ ստորագրությունները մեր համախոհների խումբը կփոխանցի Երևանում Հայաստանի Հանրապետության կառավարությանը, Ռուսաստանի Դաշնության, Ամերիկայի Միացյալ Նահանգների և Ֆրանսիայի Հանրապետության դեսպանատներին, ինչպես նաև ՄԱԿ-ի Հայաստանյան գրասենյակին»: 

Հետո ամբիոնին մոտեցավ ակցիայի նախաձեռնողներից Դավիթ Բաղրյանը: Նա, նախ, շնորհավորեց Եռատոնի կապակցությամբ, ապա` շնորհակալություն հայտնեց Եռատոնը պարգևողներին: Դավիթը ձեռքում 2 թուղթ էր պահում: Մեկը` 1988թ ստորագրահավաքի թղթերից է, մյուսը`մեր օրերի ստորագրահավաքի: Նպատակի շուրջ մեր համախմբումը 35 տարի առաջ հենց այսպես է սկսվել` ասում է Դավիթ Բաղրյանը: 

«Մենք Արցախի Հանրապետությունն ենք, մենք Ադրբեջանը չենք, մենք ենք մեր տան տերը, մենք ենք որոշելու ինչպես, որտեղ ապրենք և ում հետ բարեկամություն անենք»:

 «Ո՛Չ Արցախ էթնիկ զտմանը» ակցիային առաջիններից մեկը Արցախի նախկին պետնախարար Ռուբեն Վարդանյանը էր միացել: Նա այսօր ևս երիտասարդների կողքին էր: Արցախի համար պայքարը միայն զինված կռվելը չէ, այլ նաև հավատարմությունը սկզբունքներին, անձնականը պետականին ստորադասելու պատրաստակամությունն է, ասում է Վարդանյանը և արձանագրում` խոսքից գործի անցնելու ժամանակն է: 

«Այսօր մենք պատմություն ենք կերտում: Պատմության մեջ մենք ենք հիշվելու, մենք ենք մնալու, ոչ թե վախկոտները, կոռումպացվածները, անտարբերները: Մենք ենք մնալու պատմության մեջ որպես մարդիկ, ովքեր հայ աշխարհում կանգնել ու պաշտպանել են հայի արժանապատվությունը: Ես վստահ եմ, որ դարերի ամենակարևոր էջը դա է լինելու»:

 Եռատոնը շուրջ 3 տարի է նախկինի պես չի նշվում: Հայաստանում և Արցախում ավանդական շքերթներ և զորահանդեսներ այլևս չեն կազմակերպվում, բայց այստեղ բոլորը հիշում են թե Արցախյան բանակի ստեղծումը, թե Շուշիի ազատագրումը և թե Հայրենական Մեծ պատերազմում տարած հաղթանակը: Այսօր Արցախում Եռատոնը «նշվեց» հանրահավաքով: Հանրահավաք, որը, ըստ նախաձեռնողների, կարող է նոր մայիսների սկիզբ դառնալ:

Artsakh Public Radio
© 2021 ԱՐՑԱԽԻ ՀԱՆՐԱՅԻՆ ՌԱԴԻՈ