Ադրբեջանի կողմից գազամատակարարման  արգելափակումը խաթարել է նաև կրթական գործընթացը։ Հազարավոր աշակերտներ կշարունակեն զրկված մնալ կրթություն ստանալու իրավունքից։ Թե որքան կարող է տևել հանրապետությունում ստեղծված իրավիճակը՝ ոչ ոք չգիտի։ ԿԳՄՍ նախարարությունը փնտրում է լուծումներ՝   կրթական գործընթացը վերականգնելու համար։    Ջեռուցման խնդիրը սուր  է հատկապես մայրաքաղաքում, որովհետև շրջաններում դպրոցները հիմնականում  ջեռուցվում են վառելափայտով:   Ստեփանակերտի որոշ դպրոցների որոշ  դասասենյակներում  վերջերս փայտե վառարաններ են տեղադրվել՝ 9-րդ և 12-րդ դասարանում սովորող աշակերտների դասապրոցեսը  շարունակելու համար: ԿԳՄՍ նախարությունն իր առջև խնդիր է դրել դպրոցներում ստեղծել պայմաններ ու  վերականգնել  դասապրոցեսը  բոլոր աշակերտների համար՝ ասում է նախարարության վարչության պետ Ռայա Մուսայելյանը:  

«Հիմնական և միջնակարգ դպրոցներում տեղադրել ենք վառարններ՝ ապահովելով ավարտական դասարանների երեխաների կրթությունը: Այժմ նախարարությունը՝ կառավարության հետ միասին տարբերակներ է փնտրում, որ բոլոր երեխաները դպրոց հաճախեն: Քաղաքի 5 դպրոցները, որոնք ջեռուցվում են փայտով, շարունակում են  աշխատանքը: Շրջաններում ևս կրթությունը նորմալ հունով է ընթանում: Մեծագույն դժվարությունն այսօր Ստեփանակերտի դպրոցները վառարաններով ապահովելն է»:

 Բայց խնդիրը միայն վառաարանների ձեռքբերումը չէ։ Դպրոցները վառելափայտով   ապահովելը նույնպես  խնդիր է։ Ռայա Մուսայելյանն է մանրամասնում: 

«Փայտը հիմնականում թաց է: Ծնողները բողոքում են, բայց այդ հարցը մենք չենք կարող լուծել: Համար 2 և համար 3 դպրոցներում չենք կարողանալու դասապրոցես կազմակերպել 2-րդ հերթով, որովհետև այնտեղ առանց այդ էլ 2-րդ հերթով պարապում են Հադրութի և Շուշիի դպրոցականները»: 

ԿԳՄՍ նախարարն այսօր շրջելու է Ստեփանակերտի դպրոցներով՝ տեղում խնդիրներին ու հնարավորություններին ծանոթանալու համար: