Ադրբեջանցիների ցուցադրական կեղծ մարդասիրության տակ թաքնված իրականությունն այն է, որ կեղծ էկոակտիվիստները թույլ չեն տվել  Արցախի շտապօգնության մեքենային մոտենալ տուժած քաղաքացիներին ու նրանց տեղափոխել հիվանդանոց: Այս մասին «Արցախ» լրատվականին ասել է ԱԺ-ի «Ազատ հայրենիք-ՔՄԴ»  խմբակցության ղեկավար Արթուր Հարությունյանը: 

«Իրադարձությոնը տեղի է ունեցել այն պատճառով, որ ադրբեջանցիները չեն թողել, որպեսզի մեր շտապ օգնության մեքենաները մոտենան մեր քաղաքացիներին և օգնություն ցուցաբերեն: Նրանց առողջական վիճակից ելնելով ռուս խաղաղապահների կողմից որոշում է կայացվել, որ իրենց մեքենաներով, և նաև  այնտեղ կար մեկ ադրբեջանական մեքենա, մեր քաղաքացիներին տեղափոխել Ստեփանակերտ: Սա հերթական ապացույցն է, որ ադրբեջանական կողմը կողծ պնդումներ է շահարկում, թե իբր ճանապարհը բաց է, քաղաքացիների տեղաշարժը ազատ է»:

 Արթուր Հարությունյանն ասել է, որ Արցախի Հանրապետության քաղաքացիների տեղափոխումը նախապես համաձայնեցված է եղել ռուս խաղաղապահների հետ, այսինքն, նախապես պայմանավորված գործողություն էր։ Ադրբեջանցիների կողմից,  նրանց տեղափոխող մեքենան  կանգնեցվել է և թույլ չի տրվել  մեր քաղաքացիների մուտքը Արցախ։   Հանրապետության ԱԺ-ի նախագահի տեղակալ Գագիկ Բաղունցը դատապարտել է   տեղի ունեցածը, նշելով, որ մեր հարևանները նման վարքագծով  մեկ անգամ ևս փաստում են, որ բարբարոս հարևան են և ամեն ինչ անում են՝ Արցախը հայաթափելու համար։   

«Միանշանակ դատապարտելի է և՛ շրջափակման երևույթը, և՛ Ադրբեջանի քայլերը կոնկրետ դեպքերի առումով: Մենք ցանկացած իրավիճակում պետք է ձգտենք մաքսիմալ օգուտ քաղել: Այս հնարավորությունը մենք պետք է օգտագործենք, որպեսզի աշխարհին հասկացնենք մեր թե՛ պատմական, թե՛ միջազգային բոլոր նորմերին համապատասխան սեփական հայրենիքում ապրելու իրավունքը՝ կառուցել սեփական պետականություն»:

  Ակնհայտ է, որ Ադրբեջանը փորձում է օր առաջ  իրականացնել Արցախը հայաթափելու իր քաղաքականությունը՝ համոզված է նաև «Դաշնակցություն» խմբակցության պատգամավոր Դավիթ Իշխանյանը:

«Երեկվա միջադեպը պատահական չէր. ես չգիտեմ՝ ինչ պայմանավորվածությունների շրջանակ է եղել, ինչ մակարդակով է այդ ամենը կազմակերպվել, բայց գնահատելով երևույթը՝ շատ ակնհայտ է, որ ռուսական կողմը, ռուս խաղաղապահները պետք է հետևողականություն ցուցաբերեն և ադրբեջանական կողմին պարտադրեն՝ իրականացնելու նոյեմբերի 9-ի հայտարարությամբ ամրագրված այն դրույթը, որ Արցախը պետք է անխափան կապ ունենա Հայաստանի Հանրապետության հետ և մեր քաղաքացիները առանց խոչընդոտի պետք է կարողանան գնալ Հայաստան»:

Դավիթ Իշխանյանի խոսքով, Արցախում ստեղծված իրավիճակը և Ադրբեջանի կողմից իրականցվող գործողությունները  պետք է դիտարկել ոչ միայն վերջին  4 ամսվա, այսինքն շրջափակման կտրվածքով,  այլ  2020 թվականի պատերազմից հետո  ժամանակահատվածի․ Ադրբեջանը փորձում է օղակն Արցախի շուրջ  ավելի ու ավելի սեղմել, և երեկվա միջադեպն ընդամենը այդ նպատակին հասնելու ևս մեկ գործողություն է։  Ադրբեջանը խոչնդոտում է միայն դեպի Արցախ երթևեկությունը, փոխարենը խրախուսում  Արցախից  դուրս գալը. անդրադառնալով փաստին Դավիթ Իշխանյանը ընդգծում է, որ սա Ադրբեջանի՝ Արցախը հայաթափելու քաղաքականության դրսևորումն է: