Ադրբեջանական հարձակումների հաջողությունը պայմանավորված է մեր  մեդիաԱՆգրագիտությամբ՝   ասում է IT ոլորտի մասնագետ Արթուր Բալասանյանը։ Խոստովանում է՝ սա նաև ոլորտի մասնագետների, այդ թվում և  իր բացթողումն է։ Խնդիրը  շուտով մասնակի լուծում կստանա։

«Այս հարցով երեկ չէ առաջին օրը հանդիպել ենք պետնախարարի հետ։ Հնարավորություն է ստեղծվելու գերատեսչություններին ծանոթացնել սոցցանցերից օգտվելու նրբություններին։ Դասընթացները կարճ են տևելու, որպեսզի հասցնենք բոլորին ծանոթացնել նրբություններին։ Ամենակարևորը իմանան ինչպես շփվել, ինչ հղումներ բացել, ինչին հետևել, ինչին՝ ոչ»։

Տեղեկատվական հարձակումներից ամենաշատը պետք է զգույշ մնան մեծ լսարան ու կարևորություն ունեցող կայքէջերը, հատկապես՝ էջերի ղեկավարները։ Արթուր Բալասանյանը բացատրում է, թե ինչպես են օգտատիրոջից վերցվում անձնական տվյալները՝ ֆեյսբուք սոցիալական ցանցի օրինակով։ Օրինակը վերաբում է վերջին դեպքերին։

«Այդ ամենը կատարվում է որոշակի սպամների միջոցով, որոնք հրապարակված են ֆեյսբուքում։ Հիմա աչքիս տեսածը արձանագրեմ․ անուններ տալ չեմ ուզում, բայց ասեմ, որ մի տղամարդ-պաշտոնյա մոտ 40-45 տարեկան, իր սենյակում նստած ֆեյսբուքով հղիության թեստ է հանձնում, որը պիտի ասի, թե երեխան ինչ սեռի կլինի։ Նման թեստերը պատկերավոր թակարդներ են, նման պատկերների տակ կոդեր են, որոնք սեղմում են և տալիս անձնական տվյալները։ Այսինքն իրենք էլ չիմանալով, բոլոր անձնական տվյալները տալիս են չգիտեն՝ թե ում»։

 Վերջերս մեդիագրագիտության դասընթացներ է կազմակերպվել «Հեռանկար» ՀԿ-ում։ Դասընթացին մասնակցել է անելի քան 60 երիտասարդ։ Դասընթացները   կազմակերպության մարդկային ռեսուրսների կառավարիչ Մարինե Հովագիմյանն է կազմակերպել։  

«Ժամանակակից տեսաբաններն ու գործակցային ոլորտում ներգրավված մասնագետները այն կարծիքին են, որ մեդիագրագիտությունն անհրաժեշտություն է բոլորի համար։ Առօրյայում բոլորս առնչվում ենք այնպիսի խնդիրների, որոնք պահանջում են մեդիագրագիտության ոլորտում, գոնե, տարրական գիտելիքներ։ Պետք է անկեղծ լինենք և ասենք, որ Արցախում մեդիագրագիտության մակարդակը այդքան էլ բարձր չէ։ Նման պարապմունքներն ու դասընթացները ինչ որ չափով լրացնում են այդ բացը»։

Մեդիագրագիտության կամ ավելի ճիշտ՝ մեդիաԱՆգրագիտության հարուցած խնդիրները վերհանվեցին հատկապես 44-օրյա պատերազմի ժամանակ։  Բայց պատերազմից հետո էլ խաղի կանոնները չեն փոխվել։   Այստեղ՝ տեղեկատվական պատերազմում,  չպարտվելու համար էլ գրագիտություն է պետք․ մեդիագրագիտություն։