Դեկտեմբերի 03, 2024
iStock
Ղուկասյանների բազմազավակ ընտանիքը ապրում է Ստեփանակերտում վարձակալված երկուսենյականոց տան մեջ։ Ընտանիքը 5 երեխա ունի, ավագը չափահաս է դարձել մի քանի ամիս առաջ, փոքրը 5 տարեկան է։ Բնակարանը մինիմալ կենցաղային պայմաններ չունի՝ ասում է ընտանիքի մայրը՝ տիկին Անահիտը։
«Երկու փոքր սենյակ է, ամբողջն իրար վրա։ Երեխաներն արդեն մեծ են՝ 17-18 տարեկան, չի ստացվում այսպես ապրենք»։
Անահիտ Համբարձումյանը չի աշխատում, ամուսինը՝ Նաիրի Ղուկասյանը, զինծառայող է: Արդեն 18 տարի է այս ընտանիքը բնակարան ստանալու իր հերթին է սպասում, բայց մինչ օրս, յոթհոգանոց ընտանիքը ապրում է վարձակալությամբ: Վերջերս բնակարանային խնդրի սրացման պատճառով կարող են այս տունն էլ կորցնել, ասում է 5 երեխաների մայրը։
«Տանտիրուհին ընտանիքի հետ ներքևի հարկում է ապրում, ասում է, որ գալու ենք սենյակները վերանորոգենք, կամ իրենք մնան այդտեղ, կա՛մ իրենց հադրութցի բարեկամները»։
Բնակարան ստանալու համար տիկին Անահիտը դիմել է Աշխատանքի, սոցիալական ու միգրացիայի հարցերի նախարարություն: Անհրաժեշտ թղթերը հանձնել էր 5-րդ երեխան ծնվելուն պես, ասում է, ցուցակով 31րդ-ն են։ Պատերազմից հետո, երբ բնակարանային խնդրի առաջ կանգնածների թիվը բազմապատկվել է, փոխվել են նաև պետական մոտեցումներն ու առաջնահերթություններն այս հարցում։ Փոփոխության է ենթարկվել նաև ծնելիության և բազմազավակության խթանման ծրագիրը: Արցախի Բնակարանային կոմիտեի նախագահ Արմեն Մանգասարյանն է պարզաբանում․
«Բոլորին պետք է հերթականությամբ ապահովենք։ Եթե նախկինում բազմազավակները հերթագրված էին, ըստ գրանցման հաջորդականության, ապա հիմա կհերթագրվեն ըստ կարիքի։ Արցախյան ընտանիքում, երբ 5-րդ երեխան ծնվում է, անկախ նրանից թե քանի բնակարան ունի այդ ընտանիքը, նորից պիտի բնակարան տրամադրվեր։ Ստեղծվում է այնպիսի իրավիճակ՝ օրինակ, 3-րդ համարի ընտանիքը, որն ունի 2 բնակարան, դիմում է, որ նորից բնակարան ստանա, իսկ 72-րդը բնակարան չունի, կամ շատ վատ պայմաններում է ապրում։ Հիմա այդ հերթացուցակն ըստ կարիքի ենք սահմանելու»։
Բնակարանների տրամադրման համար նոր մեխամիզմ է մշակվելու, որը բալային համակարգի միջոցով հաշվառելու է ընտանիքներն՝ ըստ կարիքի։ Մարդկային գործոնը նվազագույնի է հասցվելու՝ ասում է Արմեն Մանգասարյանը։ Տիկին Անահիտը դիմել է Բնակարանային կոմիտե։ Հարցին հստակ պատասխան չի տրվել։ Խնդրել են ավելի ուշ մոտենալ: Զրուցակիցս հասկանում է, որ այսօր իր պես շատերն են գլխավերևում տանիք ուզում: Բայց բազմազավակ իր ընտանիքի հարցն էլ օր առաջ լուծում է պահանջում:
«Աստված տա բոլորին բնակարանով ապահովեն, այդ թվում նաև մեր ընտանիքին։ Ես սրտանց ուզում եմ, որ բոլորի գործերն էլ ստացվեն։ Թող 5 սենյականոց բնակարանի փոխարեն 3 սենյականոց տան, մենակ թե ապրելու տեղ ունենանք», -ասում է Անահիտ Համբարձումյանը։ Բնակարան ստանալու իրենց հերթին են սպասում հազարավոր ընտանիքներ: Եվ միայն շուրջբոլորն ընթացող ակտիվ բնակարանաշինությունն է, որ հույս ու համբերություն է ներշնչում տարիներով սեփական տան երազանքով ապրող այս ընտանիքին:
