«Ասկերանի զարգացման կենտրոն» ՀԿ գրասենյակը մեկ տարվա պատմություն ունի․ Ալլա Արզումանյանի ու մի խումբ այլ ակտիվ կանանց նախաձեռնությամբ և «Եվրասիա համագործակցություն» հիմնադրամի աջակցությամբ կենտրոնի կողմից իրականացվել է «Հզոր կանայք, հզոր համայնք» ծրագիրը, որը տասնյակ շահառու կանանց հնարավորություն է տվել հիմնադրել կամ զարգացնել արդեն գոյություն ունեցող բիզնես նախաձեռնությունը։ Օրերս կենտրոնը նշել է իր գործունեության առաջին տարեդարձը, ներկայացրել յուրատեսակ հաշվետվություն  մեկ տարվա գործունեության մասին։ Առաջին նախագծերն արդեն իրականություն են․ կենտրոնի ղեկավար Ալլա Արզումանյանը հպարտությամբ է ներկայացնում ծրագրի շահառուներին ու նրանց գործունեությունը կարևոր քայլ համարում համայնքի զարգացման գործում։ 

«Իրականացրել ենք զարգացման ծրագրեր կանանց մասնակցությամբ։ Ծրագրին դիմած կանանցից մրցութային փուլն անցել են 10-ը։ Փոքր դրամաշնորհներով նրանք կյանքի են կոչել իրենց գաղափարները, մտահղացումները։ Բիզնես նախագծերը տարբեր ոլորտներ էին ընդգրկում՝ գյուղատնտեսությունից մինչև ֆլորիստիկա և այլն»։

 Կենտրոնի հիմքը դարձավ Ասկերանում մինչ այդ գործող «Մայրիկ» սրճարանը, որտեղ սիրում էին հավաքվել երիտասարդներ, մեծամասամբ՝ կանայք՝ քննարկելու իրենց մտահղացումները, կիսվելու մտահոգություններով: Նրանք փորձում էին համատեղ ուժերով լուծել իրենց համայնքում առաջացած խնդիրները։ Սնեժանա Թամրազյանը երիտասարդներից մեկն է․ այսօր էլ, լինելով այլ հասարակական կազմակերպության ղեկավար, շարունակում է սերտ համագործակցել Ասկերանի զարգացման կենտրոնի հետ․ 

«Բարի գալուստ մեր օջախ, ինչպես ասում են՝ մայրիկի մոտ։ Այս տանիքի տակ հավաքվել ենք կանայք և աղջիկներ՝ իրագործելու մեր համայնքի զարգացմանն առնչվող ծրագրեր։ Հետպատերազմյա Արցախում դա անհրաժեշտություն է։ Հավաքվելով մեկ բաժակ թեյի շուրջ՝ կենտրոն այցելող ամեն կին կտրվում է իր առօրյա հոգսերից, լիցքաթափվում, նոր ուժ ու էներգիա ստանում»:

 Միջոցառմանը նաև շրջանի ղեկավարությունն էր ներկա։ Շրջվարչակազմի ղեկավար Համլետ Ապրեսյանը կարևորել է այն հանգամանքը, որ շրջկենտրոնում գործում է նման զարգացման կենտրոն, որտեղ ստեղծված են բարենպաստ պայմաններ, որպեսզի շրջանի կանայք կարողանան իրականություն դարձնել իրենց մտահղացումները։ Ինչքան հզոր է համայնքը, այնքան ամուր են պետության հիմքերը՝ ասում է։ Իսկ Ասկերանը դեռևս Արցախյան առաջին պատերազմի տարիներից է իրեն դրսևորել որպես անառիկ դարպաս և ամրոց։ Եվ պատահական չէ, որ կանայք այստեղ կոտրում են բոլոր կարծրատիպերը. փխրուն են էությամբ, ամուր են կամքով ու ոգով։ 

«Չնայած կարճ ժամանակահատվածին՝ կենտրոնը կարողացել է համբավ ձեռք բերել, միավորել շրջանի տարբեր բնակավայրերի ու տարբեր մասնագիտությունների տեր կանանց։ Դա էլ է խորհրդանշական․հայ մայրը պատրաստակամ է ամեն ձևով տեր կանգնել իր երկրին, զարգացնել այն։ Դա էլ է հայրենիքի պաշտպանություն։ Կանաչ ճանապարհ ենք մաղթում, ու թող խաղաղ երկնքի տակ իրագործեն իրենց բոլոր գաղափարները՝ ի շահ երկրի զարգացման»։ 

Տիկին Ալլան չցանկացավ ժամանակից առաջ անցնել․ համայնքի զարգացման հետ կապված նոր գաղափարներ ունեն, բայց դրանց կծանոթացնեն առաջիկայում։ Մնում է համբերել․ երևում է՝ անակնկալներ են սպասվում։