Նոյեմբերի 23, 2024
Այսօր «Արդարություն» կուսակցության երիտասարդական թևը խաղաղ ակցիա է կազմակերպել ի պաշտպանություն Դոնեցկի և Լուգանսկի Ժողովրդական Հանրապետությունների ճանաչման իրավունքի: Արցախն այսօր նույն իրավիճակում է, ինչպես Լուգանսկն ու Դոնեցկը՝ ասում է կուսակցության երիտասարդական ճյուղի ղեկավար Արշակ Աբրահամյանը: Նա հույս ունի, որ ճանաչման հերթն արդեն Արցախին է հասել:
«Արցախցին անկախ ապրելու իրավունքը վաստակել է երեք պատերազմների միջոցով և մենք աջակցում ենք Ռուսաստանի Դաշնության արտաքին քաղաքականությանը, ողջունում ենք երկու պետությունների ճանաչումը և հուսով ենք, որ հաջորդը Արցախի Հանրապետությունը կլինի»:
Ակցիայի մասնակիցներն իրենց բողոքի ձայնն են հնչեցնում աշխարհի երկակի ստանդարտների դեմ:
«Երբ մեր հակառակորդը՝ Ադրբեջանը, ռմբակոծում էր Ստեփանակերտի ծննդատունը, արգելված զինատեսակներ էր կիրառում մեր զինծառայողների հանդեպ, այդ նույն Արևմուտքը լուռ էր»:
Նույն տեղում և նույն ժամին տեղի է ունեցել մեկ այլ ակցիա: Ակցիայի միակ մասնակիցը Լարիսա Առաքելյանն էր: Նա դեմ է Ուկրաինայում ծավալվող պատերազմին, քանի որ այնտեղ հազարավոր հայեր են ապրում: Բացի այդ, նա կարծում է, որ Ռուսաստանը պետք է Արցախն էլ ճանաչեր:
«30 տարի շարունակ հայերին այստեղ սպանում էին, սահմանային իրավիճակը միշտ լարված էր, Ռուսաստանը ընդունե՞լ է Արցախը, թե: Ո՛չ, չի ընդունել: Իմ պաստառի վրա գրել եմ «Պուտին, ճանաչի՛ր Արցախը»»:
«Արդարություն» կուսակցության անդամ Մետաքսե Հակոբյանն ասում է, որ ակցիան ինքնանպատակ չէ, և որ իրենք հետևողական են լինելու Արցախը Լուգանսկի և Դոնեցկի ճակատագրին արժանացնելու համար:
«Մենք վերջերս Մոսկվայում էինք, որտեղ հանդիպել ենք տարբեր քաղաքական ուժերի, հասարակական կազմակերպությունների ներկայացուցիչների, տարբեր փորձագետների հետ: Նման համագործակցությունները շարունակական են լինելու և հնարավոր չէ՝ արդյունք չունենան»:
Ակցիայի մասնակիցների խոսքով այսօրվա միջոցառումը շարունակություն կունենա, ընդ որում՝ ոչ միայն ակցիաների տեսքով:
