Նոյեմբերի 22, 2024
Մանկական հիվանդանոցում գազի բացակայությունը լուրջ խնդիրներ է ստեղծում
By Անի Աբաղյան
Մարտի 16, 2022
Artsakhpress
«Առանց գազ արդեն անհնար է: Երբ երեխաներին միջանցքով տանում են օրինակ արյուն վերցնելու կամ ինչ որ հետազոտության, այդ ընթացքում ավելի շատ են մրսում ու չեն էլ լավանում: Այսօր չորրորդ օրն է՝ այստեղ եք»:
Արդեն ութերորդ օրն է Արցախի Հանրապետության ողջ տարածքում գազ չկա: Պետական շատ հիմնարկներ՝ այդ թվում մանկական հիվանդանոցի ջեռուցումն իրականացվում էր բնական գազով: Տնօրեն Կարեն Մելքումյանի խոսքով՝ գազի բացակայությունը մեծ խնդիրներ է առաջացրել հիվանդանոցում: Խախտվել է հիվանդանոցի կանոնավոր ջեռուցումը: Հիմա ջեռուցվում են միայն հիվանդասենյակները՝ էլեկտրական ջեռուցիչներով, որոնց մի մասը հիվանդանոցն է տրամադրում, մի մասն էլ՝ հիվանդներն են տներից բերում:
«Եղանակային պայմաններից ելնելով՝ հիվանդանոցում էլեկտրաէներգիան մեծ քանակությամբ ենք շահագործում, որի լարվածությանը հիվանդնոցի էլեկտական լարերը, մեղմ ասած, չեն դիմանում: Լույսի պարբերաբար անջատումների պատճառով էլ ստիպված ենք լինում գեներատոր միացնել, որը ողջ հիմնարկին չի ապահովում»:
Հիվանդանոցում ջուրը նույնպես լույսով են տաքացնում: Մայրիկներն ասում են, որ երեխաներին լողացնելու մասին չեն էլ մտածում: Թեյնիկով են ջուր տաքացնում, միայն խմելու համար:
«Լողացնելն էլ անհնար է, բայց լվացվելը մի կերպ կազմակերպում ենք»:
«Օրվա տարբեր ժամերի լույս էլ չենք ունենում, հետևաբար տաք ջուր էլ, իսկ երեխաների խնամքն առանց տաք ջրի դժվար է»:
Իրավիճակով պայմանավորված հետաձգվել են պլանային վիրահատությունները՝ էլեկտրաէներգիան խնայելու համար:
«Այն վիրահատությունները, որոնք շտապողականություն չեն պահանջում, իմաստ չունի նման պայմաններում կատարել: Պետք է վիրահատարանն էլ ջեռուցել, որն էլ ավելի կծանրաբեռնի գերծանրաբեռնված համակարգը»:
Ստացիոնար բուժում ստացող փոքրիկի մայրն ասում է, որ իրենց սենյակը համեմատաբար տաք է: Ասում է՝ չգիտեին, որ պետք է հիվանդանոցում մնան, թե չէ նախօրոք ջեռուցիչ կբերեին և 3 ժամ ցրտում չէին սպասի:
«Գազի բացակայության պայմաններում բավականին դժվար է, հատկապես մանկական հիվանդանոցում: Մենք տեսնում ենք, թե ինչպես են բուժքույրերը դողացող ձեռքերով գալիս սրսկում երեխաներին: Այստեղ սուր շնչառական հիվանդություններ ունեցող երեխաներ են պառկած, որոնք պետք է տաք պայմաններում լինեն, որ շուտ լավանան»:
Հիմնարկն ամբողջությամբ չի ջեռուցվում, բայց սովորական ռեժիմով գործում է լաբորատորիան, շտապ օգնության կայանը, վերակենդանացման և ստացիոնար բաժանմունքները: Կարեն Մելքումյանն ասում է, որ առողջապահության նախարարությունը տրամադրել է նաև 2-րդ գեներատորը: Իրավիճակի նույն կերպով շարունակվելու դեպքում այն նույնպես կշահագործվի:
