Նյութական վնաս կրած ֆիզիկական կամ իրավաբանական անձանց աջակցության ծրագիրն առավել կանոնակարգված իրականացնելու նպատակով՝ ընթացիկ տարվա փետրվարին ստեղծվեց  «Նյութական վնասների հարցերի» կոմիտեն: Ի սկզբանե կոմիտեի գործունեության հիմքում դրված էր սոցիալական արդարության ապահովման սկզբունքը: Ըստ այդմ՝ առաջնահերթությունը նախ տրվեց Արցախի Հանրապետության պաշտպանության համար զոհված զինծառայողների ընտանիքների անդամներին, հաջորդիվ՝ մյուս սոցիալական խմբերին:

Օգոստոսի 1-ի դրությամբ՝ 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմի հետևանքով նյութական վնաս կրած ֆիզիկական և իրավաբանական անձանց աջակցելու պետական հանձնաժողովին ներկայացվել է 9 հազար 887 դիմում, որից  1671  անհատական գործով,  շահառու է ճանաչվել 1775-ը: Կոմիտեի նախագահ Վահրամ Ղահրամանյանը պարզաբանում է, թե ինչով է պայմանավորված թվերի տարբերությունը: 

«Կան դիմումներ, որոնցով ներկայացված են մի քանի համասեփականատերեր: Դրանք լինում են հիմնականում այգիների և շենք- շինությունների դեպքում: Այս ընթացքում պետական հանձնաժողովը շահառու ճանաչելու վերաբերյալ որոշում է կայացրել՝ 8 մլրդ 419 մլն 455 հազ. ՀՀ դրամի սահմաններում»:

Ըստ Կառավարության համապատասխան որոշմամբ սահմանված կարգի՝ աջակցությունը տրամադրվում է միանվագ գումարի կամ մուրհակների տեսքով: Մուրհակների շահութաբերությունը տարեկան 7 տոկոս է՝ 5 տարի մարման ժամկետով: Իսկ միանվագ գումարների սահմանաչափը, անկախ վնասի  ու հանձնաժողովի կողմից որոշված աջակցության չափից, 5 մլն․ դրամ է:

« Նյութական վնասների աջակցության պետական հանձնաժողովի կողմից այս պահի դրությամբ կայացված որոշումներով հաստատված է 3 մլրդ 409 մլն դրամի միանվագ աջակցություն, որից շահառուներին տրամադրվել է 2 մլրդ 512 մլն 360 հազ. դրամ: Իսկ չտրամադրված գումարները, այսինքն՝ պետության պարտավորությունը՝ ճանաչված շահառուների նկատմամբ, կազմում է 898 մլն դրամ»:

Վահրամ Ղահրամանյանի խոսքով՝ լինում են նաև դեպքեր, երբ դիմումատուն շահառու չի ճանաչվում: Օրինակ՝ երբ դիմումատուն որպես կորսված միավոր է ներկայացնում պտղատու այգի, որի նկատմամբ պետական գրանցման իրավունքը բացակայում է կամ դադարեցված է եղել:  Սա հիմք է, որպեսզի մերժվի քաղաքացու դիմումը:

«Լինում են նաև դեպքեր, երբ քաղաքացին դիմում է ներկայացնում միանգամից մի քանի ուղղություններով: Եվ ունենք շատ դեպքեր, երբ այդ ուղղություններից մի քանիսով քաղաքացիները մերժում են ստացել, մնացած ուղղություններով՝ ճանաչվել շահառու: Վստահաբար ասեմ, որ մենք աշխատում ենք Կառավարության կողմից ընդունված որոշմամբ սահմանված կարգի սահմաններում»:

Այս պահի դրությամբ՝ նյութական վնասների աջակցության պետական հանձնաժողովի կողմից կայացվել է 11 որոշում, որից 3-ը՝ կոմիտեի գործունեության օրոք: Կոմիտեի նախագահի խոսքով՝ գործում են հստակ քաղաքականությամբ՝ շահառու ճանաչված անձանց նկատմամբ պետության պարտավորությունները մարել հերթականությամբ:

« Այս պահի դրությամբ արդեն զրոյացրել ենք 5 որոշումով կայացված շահառուներին տրվելիք գումարը և նույն ոճով շարունակելու ենք աշխատել: Դեռևս 2021թ. դեկտեմբերին կայացված որոշումներով  ունենք 110 շահառուի նկատմամբ պարտավորություն: Ճիշտ չենք համարում  մինչև այս պարտավորությունները մարելը, նոր մարումներ կատարել»:

Պատերազմի հետևանքով նյութական վնաս կրած անձանց աջակցության ծրագիրը շարունակվում է: Սահմանված կարգով հերթացուցակների ձևավորումը կատարվում է էլեկտրոնային ծրագրի միջոցով, որը բացառում է մարդկային գործոնը։ Վահրամ Ղահրամանյանի խոսքով՝ Կոմիտեն գործում և գործելու է բացառապես Արցախի Հանրապետության կառավարության որոշումներով սահմանված միջոցառման և կարգի շրջանակներում։