Արցախի Հանրապետության Ազգային ժողովի հերթական լիագումար նիստը սկսեց «Արցախի Հանրապետության 2022 թվականի պետական բյուջեի մասին» օրինագծի քննարկումով: Մինչ բյուջեի նախագծի՝ Ֆինանսների նախարար Վահրամ Բաղդասարյանի կողմից ներկայացնելը, խորհրդարանի խոսնակ Արթուր Թովմասյանը զգուշացրել է.
«Կանոնակարգային ընթացակարգով նախատեսված հարցերի քննարկումն ընդմիջվելու է: Նիստը շարունակվելու է, իսկ բյուջեի քննարկումն ընդմիջվելու է մինչև դեկտեմբերի 23-ը: Պատգամավորները առաջարկություններ կներկայացնեն բյուջեի նախագծի վերաբերյալ»:
Բյուջեի նախագիծը նոյեմբերի 26-ից գտնվում է խորհրդարանում. Պատգամավորները հնարավորություն են ունեցել հանձնաժողովներում և խմբակցություններում քննարկել այն, հարցադրումներ կատարել և ներկայացնել իրենց առաջարկությունները: Վահրամ Բաղդասարյանն անդրադառնում է 2021 թվականին ձևավորված տնտեսական միջավայրին, ներկայացնում ընթացիկ տարվա որոշ մակրոտնտեսական կանխատեսումային ցուցանիշներ:
«ԱՀ տնտեսությունը շարունակում է կրել պատերազմի ու Քովիդ 19-ի վնասների բացասական հետևանքները: Չնայած աշխատանքներ են տարվում տնտեսության վերականգնման ուղղությամբ, այնուամենայնիվ, ինչպես կիսամյակային, այնպես էլ 9 ամսվա տվյալներով տնտեսության բոլոր ճյուղերում արձանագրվել է անկում»:
Համախառն ներքին արդյունքի բացասական հավելաճը գրանցվել է տնտեսության բոլոր ճյուղերում անկման հետևանքով: Միակ բնագավառը, որի շնորհիվ նաև հաջողվել է 0,6 տասնորդական տոկոսով կրճատել տնտեսական ցուցանիշների նվազման միտումը՝ շինարարությունն է:
«2021թ. 9 ամսվա կտրվածքով ՀՆԱ-ն նվազել է 26,4 տոկոսով, կազմելով 162,08 մլրդ դրամ: 2022 թվականի համար կանխատեսումային ՀՆԱ-ն կկազմի 263,7 մլրդ դրամ: Կանխատեսվում է մոտ 8 տոկոս աճ, կանխատեսվող 3,2 տոկոս դեֆլյատորի պայմաններում»:
Ըստ բանախոսի, դրան նպաստելու են տնսության վերականգնմանն ուղղված ծրագրերը, որ իրականացվելու են պետության կողմից: Վահրամ Բաղդասարյանը ներկայացնում է նաև 2022 թվականի համար կանխատեսվող մակրոտնտեսական ցուցանիշները:տե
«Եկամուտների գծով 184 մլրդ 300 մլն դրամ, ծախսերի գծով 215 մլրդ 685 մլն դրամ: Դեֆիցիտը կկազմի 31 մլրդ 381 մլն դրամ: Այն կֆինանսավորվի փոխառու միջոցների հաշվին»:
Ընդ որում, սեփական եկամուտները կանխատեսվում է 40,3 մլրդ դրամ, որից հարկային եկամուտները և պետական տուրքը կկազմի 40 մլրդ դրամ: 2021 թվականի համար պլանավորված ցուցանիշներից այն աճել է 2,4 անգամ, իսկ սպասվող եկամուտներից ավել է 30 տոկոսով: Հարկեր-ՀՆԱ կանխատեսումային հարաբերակցությունը կկազմի 15,2 տաս. տոկոս: Բյուջետային վարկի չափը կկազմի 144 մլրդ դրամ, կամ ընթացիկ տարվա համար հաստատված ցուցանիշի համեմատ գրեթե 80 մլրդ դրամով ավել: Բայց, ընդգծել է ֆինանսների նախարարը, փաստ է և այն, որ հայտնի դեպքերով պայմանավորված Հայաստանի Հանրապետությունը Արցախին տրամադրել է գրեթե 64 մլրդ դրամ բյուջետային վարկ:
«2022թ. պետբյուջեի ծախսերը նախատեսվում են 215 մլրդ 681 մլն դրամ, որը 2021թ. հաստատված պետբյուջեից ավել է 63 տոկոսով: ՀՆԱ-ում ծախսերի մակարդակը կկազմի 81,8 տոկոս»:
2022 թ. բյուջեն սոցիալական ուղղվածություն ունի: Վահրամ Բաղդասարյանը ներկայացրել է հատկացումներն ըստ առանձին ոլորտերի ու ծրագրերի: Չնայած նախագիծը մանրամասը քննարկվել է, պատգամավորների մոտ հարցեր դեռ մնացել էին: Վահրամ Բաղդասարյանի իրազեկմամբ պատգամավորական խմբակցությունների և առանձին պատգամավորների կողմից խնդրո առարկա օրինագծի վերաբերյալ ներկայացվել է 93 առաջարկություն: Խորհրդարանական առաջարկությունները, որոնց կառավարությունը դրական եզրակացություն է տվել, ընդգրկվել են բյուջեի լրամշակված տարբերակում: Բյուջեի քննարկումը խորհրդարանում կշարունակվեն դեկտեմբերի 23-ին: Օրվա երկրորդ կեսին նիստը շարունակվել է օրակարգային մյուս հարցերի՝ Պետական պաշտոններ զբաղեցնող անձանց վարձատրության, Հեռուստատեսության և ռադիոյի մասին օրենքում փոփոխություններ կատարելու, Ոստիկանության զորքերի մասին և այլ օրինագծերի քննարկմամբ: Պատգամավորները հանդես են եկել մտքերի փոխանակմամբ և հայտարարություններով: Այդ մասին «Արցախ» լրատվականի վաղվա թողարկումներում:
